ghair ko tum na aankh bhar dekho

ġhair ko tum na aañkh bhar dekho

kyā ġhazab karte ho idhar dekho

ḳhaak meñ mat milāo dil ko mire

jī meñ samjho Tuk apnā ghar dekho

dekhnā zulf-o-ruḳh tumheñ har vaqt

shaam dekho na tum sahar dekho

gul hue jaate haiñ charāġh kī tarh

ham ko Tuk jald aan kar dekho

aap pe apnā iḳhtiyār nahīñ

jabr hai ham pe kis qadar dekho

raam bātoñ meñ to vo ho na sakā

naqsh o afsūñ bhī koī kar dekho

laḳht-e-dil tum na samjho mizhgāñ par

āshiqī kā ye hai samar dekho

vasl hotā nahīñ bhalā kyūñkar

apnī hastī se to guzar dekho

dekhte hī nahīñ to kyā kahiye

kahiye tab haal kuchh agar dekho

Dhalte ho tum butāñ udhar dil se

āj-kal jis ke haath zar dekho

ishq-bāzī se baaz aao 'hasan'

chhoḌ do apnā ye hunar dekho

ghair ko tum na aankh bhar dekho

kya ghazab karte ho idhar dekho

KHak mein mat milao dil ko mere

ji mein samjho Tuk apna ghar dekho

dekhna zulf-o-ruKH tumhein har waqt

sham dekho na tum sahar dekho

gul hue jate hain charagh ki tarh

hum ko Tuk jald aan kar dekho

aap pe apna iKHtiyar nahin

jabr hai hum pe kis qadar dekho

ram baaton mein to wo ho na saka

naqsh o afsun bhi koi kar dekho

laKHt-e-dil tum na samjho mizhgan par

aashiqi ka ye hai samar dekho

wasl hota nahin bhala kyunkar

apni hasti se to guzar dekho

dekhte hi nahin to kya kahiye

kahiye tab haal kuchh agar dekho

Dhalte ho tum butan udhar dil se

aaj-kal jis ke hath zar dekho

ishq-bazi se baz aao 'hasan'

chhoD do apna ye hunar dekho