ghairon se dad-e-jaur-o-jafa li gai to kya

ġhairoñ se dād-e-jaur-o-jafā lī ga.ī to kyā

ghar ko jalā ke ḳhaak uḌā dī ga.ī to kyā

ġhārat-garī-e-shahr meñ shāmil hai kaun kaun

ye baat ahl-e-shahr pe khul bhī ga.ī to kyā

ik ḳhvāb hī to thā jo farāmosh ho gayā

ik yaad hī to thī jo bhulā dī ga.ī to kyā

mīsāq-e-aitabār meñ thī ik vafā kī shart

ik shart hī to thī jo uThā dī ga.ī to kyā

qānūn-e-bāġh-bāni-e-sahra kī sarnavisht

likkhī ga.ī to kyā jo na likkhī ga.ī to kyā

is qahat-o-inhedām-e-rivāyat ke ahd meñ

tālīf nusḳha-hā-e-vafā kī ga.ī to kyā

jab 'mīr' o 'mīrzā' ke suḳhan rā.egāñ ga.e

ik be-hunar kī baat na samjhī ga.ī to kyā

ghairon se dad-e-jaur-o-jafa li gai to kya

ghar ko jala ke KHak uDa di gai to kya

ghaarat-gari-e-shahr mein shamil hai kaun kaun

ye baat ahl-e-shahr pe khul bhi gai to kya

ek KHwab hi to tha jo faramosh ho gaya

ek yaad hi to thi jo bhula di gai to kya

misaq-e-aitabar mein thi ek wafa ki shart

ek shart hi to thi jo uTha di gai to kya

qanun-e-bagh-bani-e-sahra ki sarnawisht

likkhi gai to kya jo na likkhi gai to kya

is qahat-o-inhedam-e-riwayat ke ahd mein

talif nusKHa-ha-e-wafa ki gai to kya

jab 'mir' o 'mirza' ke suKHan raegan gae

ek be-hunar ki baat na samjhi gai to kya