ghairon se mil ke hi sahi be-bak to hua

ġhairoñ se mil ke hī sahī be-bāk to huā

baare vo shoḳh pahle se chālāk to huā

jī ḳhush huā hai girte makānoñ ko dekh kar

ye shahr ḳhauf-e-ḳhud se jigar-chāk to huā

ye to huā ki aadmī pahuñchā hai maah tak

kuchh bhī huā vo vāqif-e-aflāk to huā

kuchh aur vo huā na huā mujh ko dekh kar

yād-e-bahār-e-husn se ġhamnāk to huā

is kashmakash meñ ham bhī thake to haiñ ai 'munīr'

shahr-e-ḳhudā sitam se magar paak to huā

ghairon se mil ke hi sahi be-bak to hua

bare wo shoKH pahle se chaalak to hua

ji KHush hua hai girte makanon ko dekh kar

ye shahr KHauf-e-KHud se jigar-chaak to hua

ye to hua ki aadmi pahuncha hai mah tak

kuchh bhi hua wo waqif-e-aflak to hua

kuchh aur wo hua na hua mujh ko dekh kar

yaad-e-bahaar-e-husn se ghamnak to hua

is kashmakash mein hum bhi thake to hain ai 'munir'

shahr-e-KHuda sitam se magar pak to hua