gham-e-ashiqi se kah do rah-e-am tak na pahunche

ġham-e-āshiqī se kah do rah-e-ām tak na pahuñche

mujhe ḳhauf hai ye tohmat tire naam tak na pahuñche

maiñ nazar se pī rahā thā to ye dil ne bad-duā dī

tirā haath zindagī bhar kabhī jaam tak na pahuñche

vo navā-e-muzmahil kyā na ho jis meñ dil kī dhaḌkan

vo sadā-e-ahl-e-dil kyā jo avaam tak na pahuñche

mire tā.ir-e-nafas ko nahīñ bāġhbāñ se ranjish

mile ghar meñ āb-o-dāna to ye daam tak na pahuñche

na.ī sub.h par nazar hai magar aah ye bhī Dar hai

ye sahar bhī rafta rafta kahīñ shaam tak na pahuñche

ye adā-e-be-niyāzī tujhe bevafā mubārak

magar aisī be-ruḳhī kyā ki salām tak na pahuñche

jo naqāb-e-ruḳh uThā dī to ye qaid bhī lagā dī

uThe har nigāh lekin koī baam tak na pahuñche

unheñ apne dil kī ḳhabreñ mire dil se mil rahī haiñ

maiñ jo un se ruuTh jā.ūñ to payām tak na pahuñche

vahī ik ḳhamosh naġhma hai 'shakīl' jān-e-hastī

jo zabān par na aa.e jo kalām tak na pahuñche

gham-e-ashiqi se kah do rah-e-am tak na pahunche

mujhe KHauf hai ye tohmat tere nam tak na pahunche

main nazar se pi raha tha to ye dil ne bad-dua di

tera hath zindagi bhar kabhi jam tak na pahunche

wo nawa-e-muzmahil kya na ho jis mein dil ki dhaDkan

wo sada-e-ahl-e-dil kya jo awam tak na pahunche

mere tair-e-nafas ko nahin baghban se ranjish

mile ghar mein aab-o-dana to ye dam tak na pahunche

nai subh par nazar hai magar aah ye bhi Dar hai

ye sahar bhi rafta rafta kahin sham tak na pahunche

ye ada-e-be-niyazi tujhe bewafa mubarak

magar aisi be-ruKHi kya ki salam tak na pahunche

jo naqab-e-ruKH uTha di to ye qaid bhi laga di

uThe har nigah lekin koi baam tak na pahunche

unhen apne dil ki KHabren mere dil se mil rahi hain

main jo un se ruTh jaun to payam tak na pahunche

wahi ek KHamosh naghma hai 'shakil' jaan-e-hasti

jo zaban par na aae jo kalam tak na pahunche