gham-e-firaq mai o jam ka KHayal aaya

ġham-e-firāq mai o jaam kā ḳhayāl aayā

safed baal liye sar pe ik vabāl aayā

milegā ġhair bhī un ke gale ba-shauq ai dil

halāl karne mujhe iid kā hilāl aayā

agar hai dīda-e-raushan to āftāb ko dekh

udhar uruuj huā aur idhar zavāl aayā

luTā.e dete haiñ in motiyoñ ko dīda-e-shauq

bhar aa.e ashk ki muflis ke haath maal aayā

lagī nasīm-e-bahārī jo ma.arifat gaane

guloñ pe kuchh nahīñ mauqūf sab ko haal aayā

payām-bar ko abas de ke ḳhat udhar bhejā

ġharīb aur vahāñ se shikasta-hāl aayā

ḳhudā ḳhudā karo ai 'shād' is pe naḳhvat kyā

jo shā.irī tumheñ aa.ī to kyā kamāl aayā

gham-e-firaq mai o jam ka KHayal aaya

safed baal liye sar pe ek wabaal aaya

milega ghair bhi un ke gale ba-shauq ai dil

halal karne mujhe id ka hilal aaya

agar hai dida-e-raushan to aaftab ko dekh

udhar uruj hua aur idhar zawal aaya

luTae dete hain in motiyon ko dida-e-shauq

bhar aae ashk ki muflis ke hath mal aaya

lagi nasim-e-bahaari jo marifat gane

gulon pe kuchh nahin mauquf sab ko haal aaya

payam-bar ko abas de ke KHat udhar bheja

gharib aur wahan se shikasta-haal aaya

KHuda KHuda karo ai 'shad' is pe naKHwat kya

jo shairi tumhein aai to kya kamal aaya