gham ki barish ne bhi tere naqsh ko dhoya nahin

ġham kī bārish ne bhī tere naqsh ko dhoyā nahīñ

tū ne mujh ko kho diyā maiñ ne tujhe khoyā nahīñ

niiñd kā halkā gulābī sā ḳhumār āñkhoñ meñ thā

yuuñ lagā jaise vo shab ko der tak soyā nahīñ

har taraf dīvār-o-dar aur un meñ āñkhoñ ke hujūm

kah sake jo dil kī hālat vo lab-e-goyā nahīñ

jurm aadam ne kiyā aur nasl-e-ādam ko sazā

kāTtā huuñ zindagī bhar maiñ ne jo boyā nahīñ

jāntā huuñ ek aise shaḳhs ko maiñ bhī 'munīr'

ġham se patthar ho gayā lekin kabhī royā nahīñ

gham ki barish ne bhi tere naqsh ko dhoya nahin

tu ne mujh ko kho diya main ne tujhe khoya nahin

nind ka halka gulabi sa KHumar aankhon mein tha

yun laga jaise wo shab ko der tak soya nahin

har taraf diwar-o-dar aur un mein aankhon ke hujum

kah sake jo dil ki haalat wo lab-e-goya nahin

jurm aadam ne kiya aur nasl-e-adam ko saza

kaTta hun zindagi bhar main ne jo boya nahin

jaanta hun ek aise shaKHs ko main bhi 'munir'

gham se patthar ho gaya lekin kabhi roya nahin