ye gham to hai so hai ki gharib-ud-dayar hun

ye ġham to hai so hai ki ġharīb-ud-dayār huuñ

lekin jahāñ-jahāñ huuñ maiñ dīvāna-vār huuñ

is ke sivā ba-vaqt-e-du'ā kuchh na kah sakā

maiñ bhī to āḳhir ai mire parvardigār huuñ

terī 'atā hai ārzū-e-rozgār-e-ġham

merī ḳhatā hai said-e-ġham-e-rozgār huuñ

us kī talāsh hai to mujhe dekh lījiye

maiñ us kī āzmā.ishoñ kā ishtihār huuñ

zanjīr huuñ to uljhī huī apne aap se

maiñ tiir huuñ to apne hī siine ke paar huuñ

maiñ ḳhaar thā to apne hī andar gaḌā huā

āzār thā to aaj talak barqarār huuñ

ḳhāmoshī thī to ab bhī vahī hai mirā mizāj

ġham-koshī thī to ab bhī usī kā shikār huuñ

ġham ke liye kuchh aur ḳhushī ke liye kuchh aur

jā-e-panāh huuñ kahīñ rāh-e-farār huuñ

yā'nī 'urūj hī meñ nihāñ hai mirā zavāl

pahle maiñ dil-gudāz thā ab dil-figār huuñ

tū kaun hai tū vaj.h hai mere vujūd kī

maiñ kaun huuñ maiñ ārzuoñ kā mazār huuñ

qaa.em raheñ vo jin kī badaulat hai ye madār

daa.im raheñ vo jin kā maiñ dār-o-madār huuñ

ye gham to hai so hai ki gharib-ud-dayar hun

lekin jahan-jahan hun main diwana-war hun

is ke siwa ba-waqt-e-du'a kuchh na kah saka

main bhi to aaKHir ai mere parwardigar hun

teri 'ata hai aarzu-e-rozgar-e-gham

meri KHata hai said-e-gham-e-rozgar hun

us ki talash hai to mujhe dekh lijiye

main us ki aazmaishon ka ishtihaar hun

zanjir hun to uljhi hui apne aap se

main tir hun to apne hi sine ke par hun

main KHar tha to apne hi andar gaDa hua

aazar tha to aaj talak barqarar hun

KHamoshi thi to ab bhi wahi hai mera mizaj

gham-koshi thi to ab bhi usi ka shikar hun

gham ke liye kuchh aur KHushi ke liye kuchh aur

ja-e-panah hun kahin rah-e-farar hun

ya'ni 'uruj hi mein nihan hai mera zawal

pahle main dil-gudaz tha ab dil-figar hun

tu kaun hai tu wajh hai mere wujud ki

main kaun hun main aarzuon ka mazar hun

qaem rahen wo jin ki badaulat hai ye madar

daim rahen wo jin ka main dar-o-madar hun