hum ko to gardish-e-haalat pe rona aaya

ham ko to gardish-e-hālāt pe ronā aayā

rone vaale tujhe kis baat pe ronā aayā

kaise jiite haiñ ye kis tarah jiye jaate haiñ

ahl-e-dil kī basar-auqāt pe ronā aayā

jī nahīñ aap se kyā mujh ko shikāyat hogī

haañ mujhe talḳhī-e-hālāt pe ronā aayā

husn-e-maġhrūr kā ye rañg bhī dekhā āḳhir

āḳhir un ko bhī kisī baat pe ronā aayā

kaise mar mar ke guzārī hai tumheñ kyā mālūm

raat bhar tāroñ bharī raat pe ronā aayā

kitne betāb the rim-jhim meñ piyeñge lekin

aa.ī barsāt to barsāt pe ronā aayā

husn ne apnī jafāoñ pe bahā.e aañsū

ishq ko apnī shikāyāt pe ronā aayā

kitne anjān haiñ kyā sādgī se pūchhte haiñ

kahiye kyā merī kisī baat pe ronā aayā

avval avval to bas ek aah nikal jaatī thī

āḳhir āḳhir to mulāqāt pe ronā aayā

'saif' ye din to qayāmat kī tarah guzrā hai

jaane kyā baat thī har baat pe ronā aayā

hum ko to gardish-e-haalat pe rona aaya

rone wale tujhe kis baat pe rona aaya

kaise jite hain ye kis tarah jiye jate hain

ahl-e-dil ki basar-auqat pe rona aaya

ji nahin aap se kya mujh ko shikayat hogi

han mujhe talKHi-e-haalat pe rona aaya

husn-e-maghrur ka ye rang bhi dekha aaKHir

aaKHir un ko bhi kisi baat pe rona aaya

kaise mar mar ke guzari hai tumhein kya malum

raat bhar taron bhari raat pe rona aaya

kitne betab the rim-jhim mein piyenge lekin

aai barsat to barsat pe rona aaya

husn ne apni jafaon pe bahae aansu

ishq ko apni shikayat pe rona aaya

kitne anjaan hain kya sadgi se puchhte hain

kahiye kya meri kisi baat pe rona aaya

awwal awwal to bas ek aah nikal jati thi

aaKHir aaKHir to mulaqat pe rona aaya

'saif' ye din to qayamat ki tarah guzra hai

jaane kya baat thi har baat pe rona aaya