sahil pe lai aur safine Dubo diye

sāhil pe laa.ī aur safīne Dubo diye

yuuñ zindagī ne ham ko hañsāyā ki ro diye

ahl-e-chaman ne jashn-e-bahārāñ ke naam se

vo dāstāñ sunā.ī ki dāman bhigo diye

zabt-e-ġham-e-firāq kī majbūriyāñ na pūchh

dil meñ kisī kā naam liyā aur ro diye

fariyād kī hai baat magar ab sunegā kaun

ik nāḳhudā ne kitne safīne Dubo diye

ai vā.e-sa.ī-e-zabt ki aksar tire huzūr

hañsne kā ehtimām kiyā aur ro diye

un āñsuoñ kā dekhne vaalā koī na thā

jin āñsuoñ meñ ham ne tabassum samo diye

rāh-e-junūñ meñ kaam ḳhirad se liyā hī thā

zo.af-e-talab ne paañv meñ kāñTe chubho diye

tajdīd-e-ahd-e-ishq huī aaj yuuñ 'shamīm'

nazreñ milīñ salām kiyā aur ro diye

sahil pe lai aur safine Dubo diye

yun zindagi ne hum ko hansaya ki ro diye

ahl-e-chaman ne jashn-e-bahaaran ke nam se

wo dastan sunai ki daman bhigo diye

zabt-e-gham-e-firaq ki majburiyan na puchh

dil mein kisi ka nam liya aur ro diye

fariyaad ki hai baat magar ab sunega kaun

ek naKHuda ne kitne safine Dubo diye

ai wae-sai-e-zabt ki aksar tere huzur

hansne ka ehtimam kiya aur ro diye

un aansuon ka dekhne wala koi na tha

jin aansuon mein hum ne tabassum samo diye

rah-e-junun mein kaam KHirad se liya hi tha

zoaf-e-talab ne panw mein kanTe chubho diye

tajdid-e-ahd-e-ishq hui aaj yun 'shamim'

nazren milin salam kiya aur ro diye