gul hai zaKHmi bahaar ke hathon

gul hai zaḳhmī bahār ke hāthoñ

dil hai sad-chāk yaar ke hāthoñ

dam-ba-dam qat' hotī jaatī hai

'umr lail-o-nahār ke hāthoñ

jāñ-ba-lab ho rahā huuñ misl-e-habāb

maiñ tire intizār ke hāthoñ

ek dam bhī milā na ham ko qarār

is dil-e-be-qarār ke hāthoñ

apnī sar-gashtagī kabhī na ga.ī

gardish-e-rozgār ke hāthoñ

ik shagūfa uThe hai roz nayā

is dil-e-dāġh-dār ke hāthoñ

dil pe kyā kyā hue haiñ naqsh-o-nigār

nāvak-e-dil-figār ke hāthoñ

ho rahā hai ḳharāb ḳhāna-e-dil

dīda-e-ashk-bār ke hāthoñ

gar kabhī lag gayā tirā dāman

merī musht-e-ġhubār ke hāthoñ

chhūTnā hai phir us kā amr-e-muhāl

is tire ḳhāksār ke hāthoñ

ik dil-e-ḳhār-ḳhār huuñ maiñ 'hasan'

apne us gul-ezār ke hāthoñ

gul hai zaKHmi bahaar ke hathon

dil hai sad-chaak yar ke hathon

dam-ba-dam qat' hoti jati hai

'umr lail-o-nahaar ke hathon

jaan-ba-lab ho raha hun misl-e-habab

main tere intizar ke hathon

ek dam bhi mila na hum ko qarar

is dil-e-be-qarar ke hathon

apni sar-gashtagi kabhi na gai

gardish-e-rozgar ke hathon

ek shagufa uThe hai roz naya

is dil-e-dagh-dar ke hathon

dil pe kya kya hue hain naqsh-o-nigar

nawak-e-dil-figar ke hathon

ho raha hai KHarab KHana-e-dil

dida-e-ashk-bar ke hathon

gar kabhi lag gaya tera daman

meri musht-e-ghubar ke hathon

chhuTna hai phir us ka amr-e-muhaal

is tere KHaksar ke hathon

ek dil-e-KHar-KHar hun main 'hasan'

apne us gul-ezar ke hathon