gulab hath mein ho aankh mein sitara ho

gulāb haath meñ ho aañkh meñ sitāra ho

koī vajūd mohabbat kā isti.āra ho

maiñ gahre paanī kī is rau ke saath bahtī rahūñ

jazīra ho ki muqābil koī kināra ho

kabhī-kabhār use dekh leñ kahīñ mil leñ

ye kab kahā thā ki vo ḳhush-badan hamārā ho

qusūr ho to hamāre hisāb meñ likh jaa.e

mohabbatoñ meñ jo ehsān ho tumhārā ho

ye itnī raat ga.e kaun dastakeñ degā

kahīñ havā kā hī us ne na ruup dhārā ho

ufuq to kyā hai dar-e-kahkashāñ bhī chhū aa.eñ

musāfiroñ ko agar chāñd kā ishārā ho

maiñ apne hisse ke sukh jis ke naam kar Dālūñ

koī to ho jo mujhe is tarah kā pyārā ho

agar vajūd meñ āhañg hai to vasl bhī hai

vo chāhe nazm kā TukḌā ki nasr-pāra ho

gulab hath mein ho aankh mein sitara ho

koi wajud mohabbat ka istiara ho

main gahre pani ki is rau ke sath bahti rahun

jazira ho ki muqabil koi kinara ho

kabhi-kabhaar use dekh len kahin mil len

ye kab kaha tha ki wo KHush-badan hamara ho

qusur ho to hamare hisab mein likh jae

mohabbaton mein jo ehsan ho tumhaara ho

ye itni raat gae kaun dastaken dega

kahin hawa ka hi us ne na rup dhaara ho

ufuq to kya hai dar-e-kahkashan bhi chhu aaen

musafiron ko agar chand ka ishaara ho

main apne hisse ke sukh jis ke nam kar Dalun

koi to ho jo mujhe is tarah ka pyara ho

agar wajud mein aahang hai to wasl bhi hai

wo chahe nazm ka TukDa ki nasr-para ho