gurezan tha magar aisa nahin tha

gurezāñ thā magar aisā nahīñ thā

ye merā ham-safar aisā nahīñ thā

yahāñ mehmāñ bhī aate the havā bhī

bahut pahle ye ghar aisā nahīñ thā

yahāñ kuchh log the un kī mahak thī

kabhī ye rahguzar aisā nahīñ thā

rahā kartā thā jab vo is makāñ meñ

to rañg-e-bām-o-dar aisā nahīñ thā

bas ik dhun thī nibhā jaane kī us ko

gañvāne meñ zarar aisā nahīñ thā

mujhe to ḳhvāb hī lagtā hai ab tak

vo kyā thā vo agar aisā nahīñ thā

paḌegī dekhnī dīvār bhī ab

ki ye sauda-e-sar aisā nahīñ thā

ḳhabar luuñ jā ke us īsā-nafs kī

vo mujh se be-ḳhabar aisā nahīñ thā

na jaane kyā huā hai kuchh dinoñ se

ki maiñ ai chashm-e-tar aisā nahīñ thā

yuuñ hī nimTā diyā hai jis ko tū ne

vo qissa muḳhtasar aisā nahīñ thā

gurezan tha magar aisa nahin tha

ye mera ham-safar aisa nahin tha

yahan mehman bhi aate the hawa bhi

bahut pahle ye ghar aisa nahin tha

yahan kuchh log the un ki mahak thi

kabhi ye rahguzar aisa nahin tha

raha karta tha jab wo is makan mein

to rang-e-baam-o-dar aisa nahin tha

bas ek dhun thi nibha jaane ki us ko

ganwane mein zarar aisa nahin tha

mujhe to KHwab hi lagta hai ab tak

wo kya tha wo agar aisa nahin tha

paDegi dekhni diwar bhi ab

ki ye sauda-e-sar aisa nahin tha

KHabar lun ja ke us isa-nafs ki

wo mujh se be-KHabar aisa nahin tha

na jaane kya hua hai kuchh dinon se

ki main ai chashm-e-tar aisa nahin tha

yun hi nimTa diya hai jis ko tu ne

wo qissa muKHtasar aisa nahin tha