guzarne ko to apni zindagi ab bhi guzarti hai

guzarne ko to apnī zindagī ab bhī guzartī hai

magar aise ki jaise chob se aarī guzartī hai

tirā milnā tirā mil kar bichhaḌnā yaad aatā hai

kisī signal pe ruk kar jab koī gaaḌī guzartī hai

mirā din bhī mirī shab kī tarah tārīk rahtā hai

ye kaisī raat hai jo sub.h tak aadhī guzartī hai

mirī ḳhāmosh dastak par khule jaate haiñ darvāze

sadā-e-be-sadā kamroñ se kuchh jaldī guzartī hai

mire kamre meñ jab pahlī kiran sūraj kī aatī hai

fanā ke karb se shab bhar kī tārīkī guzartī hai

kisī nā-ḳhvāñda būḌhe kī tarah ḳhat us kā paḌhtā huuñ

ki sau sau baar har ik lafz se unglī guzartī hai

hamāre gaañv meñ ab koī bhī gaaḌī nahīñ ruktī

agarche rail kī paTrī yuuñ hī ab bhī guzartī hai

mirī maano to apne band kamre meñ chale jaao

kabhī tanhā.ī meñ bhī zindagī achchhī guzartī hai

hamesha thaam kar rakhtā huuñ maiñ ummīd kā dāman

bahut māyūs ho kar mujh se māyūsī guzartī hai

guzar aaya huuñ us bastī se maiñ 'at.har-azīm' āḳhir

mire andar se ab har roz ik bastī guzartī hai

guzarne ko to apni zindagi ab bhi guzarti hai

magar aise ki jaise chob se aari guzarti hai

tera milna tera mil kar bichhaDna yaad aata hai

kisi signal pe ruk kar jab koi gaDi guzarti hai

mera din bhi meri shab ki tarah tarik rahta hai

ye kaisi raat hai jo subh tak aadhi guzarti hai

meri KHamosh dastak par khule jate hain darwaze

sada-e-be-sada kamron se kuchh jaldi guzarti hai

mere kamre mein jab pahli kiran suraj ki aati hai

fana ke karb se shab bhar ki tariki guzarti hai

kisi na-KHwanda buDhe ki tarah KHat us ka paDhta hun

ki sau sau bar har ek lafz se ungli guzarti hai

hamare ganw mein ab koi bhi gaDi nahin rukti

agarche rail ki paTri yun hi ab bhi guzarti hai

meri mano to apne band kamre mein chale jao

kabhi tanhai mein bhi zindagi achchhi guzarti hai

hamesha tham kar rakhta hun main ummid ka daman

bahut mayus ho kar mujh se mayusi guzarti hai

guzar aaya hun us basti se main 'athar-azim' aaKHir

mere andar se ab har roz ek basti guzarti hai