hae dam bhar bhi dil Thahar na saka

haa.e dam bhar bhī dil Thahar na sakā

haath siine pe koī dhar na sakā

ā.īna kis se dekhā jaatā hai

rashk ke maare vo sañvar na sakā

rah gayā aañkh meñ nazākat se

dil meñ naqsha tirā utar na sakā

is jahāñ se guzar ga.e lākhoñ

us galī se koī guzar na sakā

mai-kashī se najāt mushkil hai

mai kā Duubā kabhī ubhar na sakā

merā naama ḳhat-e-muqaddar thā

ki nazar se tirī guzar na sakā

jo tire ishq meñ tabāh huā

koī us ko tabāh kar na sakā

aag aisī lagī thī siine meñ

aañkh se dil meñ vo utar na sakā

mausam-e-gul meñ bhī 'jalīl' afsos

dāman apnā guloñ se bhar na sakā

hae dam bhar bhi dil Thahar na saka

hath sine pe koi dhar na saka

aaina kis se dekha jata hai

rashk ke mare wo sanwar na saka

rah gaya aankh mein nazakat se

dil mein naqsha tera utar na saka

is jahan se guzar gae lakhon

us gali se koi guzar na saka

mai-kashi se najat mushkil hai

mai ka Duba kabhi ubhar na saka

mera nama KHat-e-muqaddar tha

ki nazar se teri guzar na saka

jo tere ishq mein tabah hua

koi us ko tabah kar na saka

aag aisi lagi thi sine mein

aankh se dil mein wo utar na saka

mausam-e-gul mein bhi 'jalil' afsos

daman apna gulon se bhar na saka