hai dil mein ghubar uske ghar apna na karenge

hai dil meñ ġhubār us ke ghar apnā na kareñge

ham ḳhaak meñ milne kī tamannā na kareñge

kyūñkar ye kaheñ minnat-e-ādā na kareñge

kyā kyā na kiyā ishq meñ kyā kyā na kareñge

hañs hañs ke vo mujh se hī mire qatl kī bāteñ

is tarah se karte haiñ ki goyā na kareñge

kyā naame meñ likkhūñ dil-e-vābasta kā ahvāl

mālūm hai pahle hī ki vo vā na kareñge

ġhairoñ se shakar-lab suḳhan-e-talḳh bhī terā

har chand halāhil ho gavārā na kareñge

bīmār-e-ajal-chāra ko gar hazrat-e-īsā

achchhā bhī kareñge to kuchh achchhā na kareñge

jhunjhlāte ho kyā dījiye ik bosa dahan kā

ho jā.eñge lab band to ġhauġhā na kareñge

dīvār ke gir paḌte hī uThne lage tūfāñ

ab baiTh ke kone meñ bhī royā na kareñge

gar sāmne us ke bhī gire ashk to dil se

kyuuñ roz-e-jazā ḳhuun kā daavā na kareñge

kis vaqt kiyā mardumak-e-chashm kā shikva

ai parda-nashīñ ham tujhe rusvā na kareñge

nāseh kaf-e-afsos na mal chal tujhe kyā kaam

pāmāl kareñge vo mujhe yā na kareñge

us kū meñ Thaharne na diyā josh-e-qalaq ne

aġhyār se ham shikva-e-bejā na kareñge

gar zikr-e-vafā se yahī ġhussa hai to ab se

go qatl kā vaada ho taqāzā na kareñge

'momin' vo ġhazal kahte haiñ ab jis se ye mazmūn

khul jaa.e ki tark-e-dar-e-but-ḳhāna kareñge

hai dil mein ghubar us ke ghar apna na karenge

hum KHak mein milne ki tamanna na karenge

kyunkar ye kahen minnat-e-ada na karenge

kya kya na kiya ishq mein kya kya na karenge

hans hans ke wo mujh se hi mere qatl ki baaten

is tarah se karte hain ki goya na karenge

kya name mein likkhun dil-e-wabasta ka ahwal

malum hai pahle hi ki wo wa na karenge

ghairon se shakar-lab suKHan-e-talKH bhi tera

har chand halahil ho gawara na karenge

bimar-e-ajal-chaara ko gar hazrat-e-isa

achchha bhi karenge to kuchh achchha na karenge

jhunjhlate ho kya dijiye ek bosa dahan ka

ho jaenge lab band to ghaugha na karenge

diwar ke gir paDte hi uThne lage tufan

ab baiTh ke kone mein bhi roya na karenge

gar samne us ke bhi gire ashk to dil se

kyun roz-e-jaza KHun ka dawa na karenge

kis waqt kiya mardumak-e-chashm ka shikwa

ai parda-nashin hum tujhe ruswa na karenge

naseh kaf-e-afsos na mal chal tujhe kya kaam

pamal karenge wo mujhe ya na karenge

us ku mein Thaharne na diya josh-e-qalaq ne

aghyar se hum shikwa-e-beja na karenge

gar zikr-e-wafa se yahi ghussa hai to ab se

go qatl ka wada ho taqaza na karenge

'momin' wo ghazal kahte hain ab jis se ye mazmun

khul jae ki tark-e-dar-e-but-KHana karenge