hum ko shab-e-visal bhi ranj-o-mehan hua

ham ko shab-e-visāl bhī ranj-o-mehan huā

qismat ḳhilāf-e-tab.a huā jo suḳhan huā

phir aane kī havas meñ sahar kis ḳhushī ke saath

hamrāh-e-nāla dard-e-jigar bhī ma.an huā

gardish bhī us ke kūche meñ hai aur qarār bhī

qismat to dekhiye ki safar meñ vatan huā

qātil adā-e-shukr ko yā shikvoñ ke liye

jo zaḳhm jism par huā goyā dahan huā

sābit-qadam huā na rah-e-'ishq meñ koī

majnūñ koī huā to koī kohkan huā

kuchh mujh se shab ko ġhair ke iz.hār ke liye

ye 'ishq-bāzī kī thī ki apnā ye fan huā

dushman se aur hotīñ bahut bāteñ pyaar kī

shukr-e-ḳhudā ye hai ki vo but kam-suḳhan huā

lab par hañsī vo aa.ī vo chīn-e-jabīñ ga.ī

kahtā to huuñ ḳhatā huī dīvāna-pan huā

ā.īna dekh dekh ke kyā dekhte ho tum

chhūnā bhī yaañ nasīb tumhārā badan huā

ab bosa dene meñ tumheñ kis baat kā hai 'uzr

gaalī ke dene se hameñ sābit dahan huā

haq baat to ye hai ki usī but ke vāste

zāhid koī huā to koī barhaman huā

taqdīr kī ye baat hai ab kyā kare koī

raazī hue vo bose pe to gum dahan huā

phir mere iztirāb meñ kyuuñ shak hai aap ko

ulfat kā jab yaqīñ tumheñ ai jān-e-man huā

lab tak na aayā harf-e-tamannā kabhī 'nizām'

goyā mirā suḳhan bhī tumhārā dahan huā

hum ko shab-e-visal bhi ranj-o-mehan hua

qismat KHilaf-e-taba hua jo suKHan hua

phir aane ki hawas mein sahar kis KHushi ke sath

hamrah-e-nala dard-e-jigar bhi man hua

gardish bhi us ke kuche mein hai aur qarar bhi

qismat to dekhiye ki safar mein watan hua

qatil ada-e-shukr ko ya shikwon ke liye

jo zaKHm jism par hua goya dahan hua

sabit-qadam hua na rah-e-'ishq mein koi

majnun koi hua to koi kohkan hua

kuchh mujh se shab ko ghair ke izhaar ke liye

ye 'ishq-bazi ki thi ki apna ye fan hua

dushman se aur hotin bahut baaten pyar ki

shukr-e-KHuda ye hai ki wo but kam-suKHan hua

lab par hansi wo aai wo chin-e-jabin gai

kahta to hun KHata hui diwana-pan hua

aaina dekh dekh ke kya dekhte ho tum

chhuna bhi yan nasib tumhaara badan hua

ab bosa dene mein tumhein kis baat ka hai 'uzr

gali ke dene se hamein sabit dahan hua

haq baat to ye hai ki usi but ke waste

zahid koi hua to koi barhaman hua

taqdir ki ye baat hai ab kya kare koi

raazi hue wo bose pe to gum dahan hua

phir mere iztirab mein kyun shak hai aap ko

ulfat ka jab yaqin tumhein ai jaan-e-man hua

lab tak na aaya harf-e-tamanna kabhi 'nizam'

goya mera suKHan bhi tumhaara dahan hua