hum samajhte hain aazmane ko

ham samajhte haiñ āzmāne ko

uzr kuchh chāhiye satāne ko

sañg-e-dar se tire nikālī aag

ham ne dushman kā ghar jalāne ko

sub.h-e-ishrat hai vo na shām-e-visāl

haa.e kyā ho gayā zamāne ko

bul-havas ro.e mere girye pe ab

muñh kahāñ tere muskurāne ko

barq kā āsmān par hai dimāġh

phūñk kar mere āshiyāne ko

sañg-e-saudā junūñ meñ lete haiñ

apnā ham maqbara banāne ko

shikva hai ġhair kī kudūrat kā

so mire ḳhaak meñ milāne ko

roz-e-mahshar bhī hosh gar aayā

jā.eñge ham sharāb-ḳhāne ko

sun ke vasf us pe mar gayā hamdam

ḳhuub aayā thā ġham uThāne ko

koī din ham jahāñ meñ baiThe haiñ

āsmāñ ke sitam uThāne ko

chal ke kaabe meñ sajda kar 'momin'

chhoḌ us but ke āstāne ko

naqsh-e-pā-e-raqīb kī mehrāb

nahīñ zebinda sar jhukāne ko

hum samajhte hain aazmane ko

uzr kuchh chahiye satane ko

sang-e-dar se tere nikali aag

hum ne dushman ka ghar jalane ko

subh-e-ishrat hai wo na sham-e-visal

hae kya ho gaya zamane ko

bul-hawas roe mere girye pe ab

munh kahan tere muskurane ko

barq ka aasman par hai dimagh

phunk kar mere aashiyane ko

sang-e-sauda junun mein lete hain

apna hum maqbara banane ko

shikwa hai ghair ki kudurat ka

so mere KHak mein milane ko

roz-e-mahshar bhi hosh gar aaya

jaenge hum sharab-KHane ko

sun ke wasf us pe mar gaya hamdam

KHub aaya tha gham uThane ko

koi din hum jahan mein baiThe hain

aasman ke sitam uThane ko

chal ke kabe mein sajda kar 'momin'

chhoD us but ke aastane ko

naqsh-e-pa-e-raqib ki mehrab

nahin zebinda sar jhukane ko