hamari aankhon mein ashkon ka aa ke rah jaana

hamārī āñkhoñ meñ ashkoñ kā aa ke rah jaanā

jhukā ke sar ko tirā muskurā ke rah jaanā

dilā bahut na ulajh nāma-bar ko kyā maiñ ne

sikhā diyā thā ki jaanā to jā ke rah jaanā

shahīd-e-nāz kī bhūlī nahīñ mujhe sūrat

tirī taraf ko nigāheñ phirā ke rah jaanā

vo bazm-e-ġhair vo har baar iztirāb mirā

ba-maslahat vo tirā muskurā ke rah jaanā

Thahar to jā ruḳh-e-jānāñ pe ai nigah kuchh der

sanad nahīñ faqat aañsū bahā ke rah jaanā

nigāh-e-nāz se saaqī kā dekhnā mujh ko

mirā vo haath meñ sāġhar uThā ke rah jaanā

jo pūchheñ hashr meñ kuchh vo to haañ dilā shābāsh

vahāñ bhī tū yuuñ hī bāteñ banā ke rah jaanā

agar thā nashsha to girnā thā pā-e-ḳhum pe mujhe

mujhe pasand nahīñ laḌkhaḌā ke rah jaanā

nahīñ ye husn nahīñ baḳht kī hai kotāhī

savāl-e-vasl kā hoñToñ tak aa ke rah jaanā

kisī tarah to ye jism-e-kasīf paak ho shaad

galī meñ yaar kī jaanā to jā ke rah jaanā

hamari aankhon mein ashkon ka aa ke rah jaana

jhuka ke sar ko tera muskura ke rah jaana

dila bahut na ulajh nama-bar ko kya main ne

sikha diya tha ki jaana to ja ke rah jaana

shahid-e-naz ki bhuli nahin mujhe surat

teri taraf ko nigahen phira ke rah jaana

wo bazm-e-ghair wo har bar iztirab mera

ba-maslahat wo tera muskura ke rah jaana

Thahar to ja ruKH-e-jaanan pe ai nigah kuchh der

sanad nahin faqat aansu baha ke rah jaana

nigah-e-naz se saqi ka dekhna mujh ko

mera wo hath mein saghar uTha ke rah jaana

jo puchhen hashr mein kuchh wo to han dila shabash

wahan bhi tu yun hi baaten bana ke rah jaana

agar tha nashsha to girna tha pa-e-KHum pe mujhe

mujhe pasand nahin laDkhaDa ke rah jaana

nahin ye husn nahin baKHt ki hai kotahi

sawal-e-wasl ka honTon tak aa ke rah jaana

kisi tarah to ye jism-e-kasif pak ho shad

gali mein yar ki jaana to ja ke rah jaana