hamari sair ko gulshan se ku-e-yar behtar tha

hamārī sair ko gulshan se kū-e-yār behtar thā

nafīr-e-bulbuloñ se nāla-hā-e-zār behtar thā

anal-haq kī haqīqat ko jo ho mansūr so jaane

ki us ko āsmāñ chaḌhne se chaḌhnā daar behtar thā

kabhū bīmār sun kar vo ayādat ko to aatā thā

hameñ apne bhale hone se vo āzār behtar thā

tū apne man kā mankā pher zāhid varna kyā hāsil

tujhe is makr kī tasbīh se zunnār behtar thā

na kahtā maiñ ki āshiq huuñ tirā to kyuuñ vo ram kartā

mujhe iqrār ab karne se vo inkār behtar thā

hamārī aql meñ ghar kī giraftārī se 'hātim' ko

kaho dīvāna phirnā kūcha o bāzār behtar thā

hamari sair ko gulshan se ku-e-yar behtar tha

nafir-e-bulbulon se nala-ha-e-zar behtar tha

anal-haq ki haqiqat ko jo ho mansur so jaane

ki us ko aasman chaDhne se chaDhna dar behtar tha

kabhu bimar sun kar wo ayaadat ko to aata tha

hamein apne bhale hone se wo aazar behtar tha

tu apne man ka manka pher zahid warna kya hasil

tujhe is makr ki tasbih se zunnar behtar tha

na kahta main ki aashiq hun tera to kyun wo ram karta

mujhe iqrar ab karne se wo inkar behtar tha

hamari aql mein ghar ki giraftari se 'hatim' ko

kaho diwana phirna kucha o bazar behtar tha