hamein KHabar nahin kuchh kaun hai kahan koi hai

hameñ ḳhabar nahīñ kuchh kaun hai kahāñ koī hai

hamesha shaad ho ābād ho jahāñ koī hai

jagah na chhoḌe ki sail-e-balā hai tez bahut

uḌā paḌā hī rahe ab jahāñ tahāñ koī hai

fishār-e-girya kisī taur be-maqām nahīñ

dayār-e-ġham hai kahīñ par pas-e-fuġhāñ koī hai

vo koī ḳhadsha hai yā vahm-e-ḳhvāb hai ki ḳhayāl

ki ho na ho mire dil apne darmiyāñ koī hai

kabhī to aisā hai jaise kahīñ pe kuchh bhī nahīñ

kabhī ye lagtā hai jaise yahāñ vahāñ koī hai

kabhī kabhī to ye lagtā hai fard fard haiñ ham

ye aur baat hamārā bhī kārvāñ koī hai

kahīñ pahuñchnā nahīñ hai use magar phir bhī

misāl-e-bād-e-bahārāñ ravāñ-davāñ koī hai

huā hai apne safar se hazar se begāna

vahīñ vahīñ pe nahīñ hai jahāñ jahāñ koī hai

chhalak jo uThtī hai ye aañkh fart-e-vasl meñ bhī

to sarḳhushī meñ abhī ranj-e-rā.egāñ koī hai

shikast-e-dil hai to kyā rāh-e-ishq tark na kar

ye dekh kyā kahīñ parvarda-e-ziyāñ koī hai

ab us nigāh-e-fusūñ-kār kā qusūr hai kyā

hameñ dikhāo agar zaḳhm kā nishāñ koī hai

kahīñ pe aaj bhī vo ghar hai hañstā bastā huā

ye vahm sā hai tire dil ko yā gumāñ koī hai

javār-e-qarya-e-yārāñ meñ jā nikaltā huuñ

ki jaise ab bhī vahīñ merā mehrbāñ koī hai

hamein KHabar nahin kuchh kaun hai kahan koi hai

hamesha shad ho aabaad ho jahan koi hai

jagah na chhoDe ki sail-e-bala hai tez bahut

uDa paDa hi rahe ab jahan tahan koi hai

fishaar-e-girya kisi taur be-maqam nahin

dayar-e-gham hai kahin par pas-e-fughan koi hai

wo koi KHadsha hai ya wahm-e-KHwab hai ki KHayal

ki ho na ho mere dil apne darmiyan koi hai

kabhi to aisa hai jaise kahin pe kuchh bhi nahin

kabhi ye lagta hai jaise yahan wahan koi hai

kabhi kabhi to ye lagta hai fard fard hain hum

ye aur baat hamara bhi karwan koi hai

kahin pahunchna nahin hai use magar phir bhi

misal-e-baad-e-bahaaran rawan-dawan koi hai

hua hai apne safar se hazar se begana

wahin wahin pe nahin hai jahan jahan koi hai

chhalak jo uThti hai ye aankh fart-e-wasl mein bhi

to sarKHushi mein abhi ranj-e-raegan koi hai

shikast-e-dil hai to kya rah-e-ishq tark na kar

ye dekh kya kahin parwarda-e-ziyan koi hai

ab us nigah-e-fusun-kar ka qusur hai kya

hamein dikhao agar zaKHm ka nishan koi hai

kahin pe aaj bhi wo ghar hai hansta basta hua

ye wahm sa hai tere dil ko ya guman koi hai

jawar-e-qarya-e-yaran mein ja nikalta hun

ki jaise ab bhi wahin mera mehrban koi hai