har-chand gam gam hawadis safar mein hain

har-chand gaam gaam havādis safar meñ haiñ

vo ḳhush-nasīb haiñ jo tirī rahguzar meñ haiñ

tākīd-e-zabt ahd-e-vafā izn-e-zindagī

kitne payām ik nigah-e-muḳhtasar meñ haiñ

maazī sharīk-e-hāl hai koshish ke bāvajūd

dhuñdle se kuchh nuqūsh abhī tak nazar meñ haiñ

lillāh is ḳhulūs se pursish na kījiye

tūfān kab se band mirī chashm-e-tar meñ haiñ

manzil to ḳhush-nasīboñ meñ taqsīm ho chukī

kuchh ḳhush-ḳhayāl log abhī tak safar meñ haiñ

mahfil meñ un kī samt nigāheñ na uTh sakīñ

ham bil-ḳhusūs ahl-e-nazar kī nazar meñ haiñ

ye kaise rāh-rau the ki har naqsh-e-pā ke saath

sajdoñ ke kuchh nishān bhī is rahguzar meñ haiñ

har-chand gam gam hawadis safar mein hain

wo KHush-nasib hain jo teri rahguzar mein hain

takid-e-zabt ahd-e-wafa izn-e-zindagi

kitne payam ek nigah-e-muKHtasar mein hain

mazi sharik-e-haal hai koshish ke bawajud

dhundle se kuchh nuqush abhi tak nazar mein hain

lillah is KHulus se pursish na kijiye

tufan kab se band meri chashm-e-tar mein hain

manzil to KHush-nasibon mein taqsim ho chuki

kuchh KHush-KHayal log abhi tak safar mein hain

mahfil mein un ki samt nigahen na uTh sakin

hum bil-KHusus ahl-e-nazar ki nazar mein hain

ye kaise rah-rau the ki har naqsh-e-pa ke sath

sajdon ke kuchh nishan bhi is rahguzar mein hain