har ek hath mein patthar dikhai deta hai

har ek haath meñ patthar dikhā.ī detā hai

ye zaḳhm ghar se nikal kar dikhā.ī detā hai

sunā hai ab bhī mire haath kī lakīroñ meñ

najūmiyoñ ko muqaddar dikhā.ī detā hai

ab inkisār bhī shāmil hai vaz.a meñ us kī

use bhī ab koī ham-sar dikhā.ī detā hai

girā na mujh ko mire ḳhvāb kī bulandī se

yahāñ se mujh ko mirā ghar dikhā.ī detā hai

jahāñ jahāñ bhī hai nahr-e-furāt kā imkāñ

vahīñ yazīd kā lashkar dikhā.ī detā hai

ḳhudā ke shahr meñ phir koī sañgsār huā

jise bhī dekhiye patthar dikhā.ī detā hai

'amīr' kis ko batāoge kaun mānegā

sarāb hai jo samundar dikhā.ī detā hai

har ek hath mein patthar dikhai deta hai

ye zaKHm ghar se nikal kar dikhai deta hai

suna hai ab bhi mere hath ki lakiron mein

najumiyon ko muqaddar dikhai deta hai

ab inkisar bhi shamil hai waza mein us ki

use bhi ab koi ham-sar dikhai deta hai

gira na mujh ko mere KHwab ki bulandi se

yahan se mujh ko mera ghar dikhai deta hai

jahan jahan bhi hai nahr-e-furaat ka imkan

wahin yazid ka lashkar dikhai deta hai

KHuda ke shahr mein phir koi sangsar hua

jise bhi dekhiye patthar dikhai deta hai

'amir' kis ko bataoge kaun manega

sarab hai jo samundar dikhai deta hai