ہر نالہ ترے درد سے اب اور ہی کچھ ہے
ہر نالہ ترے درد سے اب اور ہی کچھ ہے
ہر نغمہ سر بزم طرب اور ہی کچھ ہے
ارباب وفا جان بھی دینے کو ہیں تیار
ہستی کا مگر حسن طلب اور ہی کچھ ہے
یہ کام نہ لے نالہ و فریاد و فغاں سے
افلاک الٹ دینے کا ڈھب اور ہی کچھ ہے
اک سلسلۂ راز ہے جینا کہ ہو مرنا
جب اور ہی کچھ تھا مگر اب اور ہی کچھ ہے
کچھ مہر قیامت ہے نہ کچھ نار جہنم
ہشیار کہ وہ قہر و غضب اور ہی کچھ ہے
مذہب کی خرابی ہے نہ اخلاق کی پستی
دنیا کے مصائب کا سبب اور ہی کچھ ہے
بیہودہ سری سجدے میں ہے جان کھپانا
آئین محبت میں ادب اور ہی کچھ ہے
کیا حسن کے انداز تغافل کی شکایت
پیمان وفا عشق کا جب اور ہی کچھ ہے
دنیا کو جگا دے جو عدم کو بھی سلا دے
سنتے ہیں کہ وہ روز وہ شب اور ہی کچھ ہے
آنکھوں نے فراقؔ آج نہ پوچھو جو دکھایا
جو کچھ نظر آتا ہے وہ سب اور ہی کچھ ہے
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
