jala ke mishal-e-jaan hum junun-sifat chale

jalā ke mish.al-e-jāñ ham junūñ-sifāt chale

jo ghar ko aag lagā.e hamāre saath chale

dayār-e-shām nahīñ manzil-e-sahar bhī nahīñ

ajab nagar hai yahāñ din chale na raat chale

hamāre lab na sahī vo dahān-e-zaḳhm sahī

vahīñ pahuñchtī hai yaaro kahīñ se baat chale

sutūn-e-dār pe rakhte chalo saroñ ke charāġh

jahāñ talak ye sitam kī siyāh raat chale

huā asiir koī ham-navā to duur talak

ba-pās-e-tarz-e-navā ham bhī saath saath chale

bachā ke laa.e ham ai yaar phir bhī naqd-e-vafā

agarche luTte rahe rahzanoñ ke haath chale

phir aa.ī fasl ki mānind barg-e-āvāra

hamāre naam guloñ ke murāslāt chale

qatār-e-shisha hai yā kārvān-e-ham-safarāñ

ḳhirām-e-jām hai yā jaise kā.enāt chale

bhulā hī baiThe jab ahl-e-haram to ai 'majrūh'

baġhal meñ ham bhī liye ik sanam kā haath chale

jala ke mishal-e-jaan hum junun-sifat chale

jo ghar ko aag lagae hamare sath chale

dayar-e-sham nahin manzil-e-sahar bhi nahin

ajab nagar hai yahan din chale na raat chale

hamare lab na sahi wo dahan-e-zaKHm sahi

wahin pahunchti hai yaro kahin se baat chale

sutun-e-dar pe rakhte chalo saron ke charagh

jahan talak ye sitam ki siyah raat chale

hua asir koi ham-nawa to dur talak

ba-pas-e-tarz-e-nawa hum bhi sath sath chale

bacha ke lae hum ai yar phir bhi naqd-e-wafa

agarche luTte rahe rahzanon ke hath chale

phir aai fasl ki manind barg-e-awara

hamare nam gulon ke muraslat chale

qatar-e-shisha hai ya karwan-e-ham-safaran

KHiram-e-jam hai ya jaise kaenat chale

bhula hi baiThe jab ahl-e-haram to ai 'majruh'

baghal mein hum bhi liye ek sanam ka hath chale