hazaron siten aisi ki har site pe dam nikle

hazāroñ siteñ aisī ki har site pe dam nikle

na pūchho kis tarah phir cyber cafe se ham nikle

sab 'āshiq thak ga.e upload kar ke apnī site par

visāl-e-yār kī cd meñ sau sau pech-o-ḳham nikle

vahāñ ab har taraf computeroñ ke chūhe phirte haiñ

mire likhne ke kamre se sabhī kāġhaz qalam nikle

'adū kā password uf kis balā kā pairahan niklā

ġhazab kī jalva-ārā.ī meñ shīshe ke sanam nikle

hameñ site-navardī ko to gōgle jām-e-jam Thahrā

jahāñ-bīnī ko ab kyūñkar ye kamre se qadam nikle

qayāmat-ḳhez chatting meñ halākat-ḳhez hacking thī

so apnī pass-bōk meñ Dher se ā'dād kam nikle

blogging kī qasam bad-qismatī kyā virus niklī

ḳhushī kī downloading kī alam ke zer-o-bam nikle

raqīb-o-yār kī tuning kahāñ chal kar kahāñ pahuñchī

barāmad junk mailoñ meñ murakkab pech-o-ḳham nikle

ḳhushā ai vādī-e-surfing ba-chashm-e-'shāhid'-e-hairāñ

hamāre bi-focal meñ ġhazab ke zer-o-bam nikle

hazaron siten aisi ki har site pe dam nikle

na puchho kis tarah phir cyber cafe se hum nikle

sab 'ashiq thak gae upload kar ke apni site par

visal-e-yar ki cd mein sau sau pech-o-KHam nikle

wahan ab har taraf computeron ke chuhe phirte hain

mere likhne ke kamre se sabhi kaghaz qalam nikle

'adu ka password uf kis bala ka pairahan nikla

ghazab ki jalwa-arai mein shishe ke sanam nikle

hamein site-nawardi ko to google jam-e-jam Thahra

jahan-bini ko ab kyunkar ye kamre se qadam nikle

qayamat-KHez chatting mein halakat-KHez hacking thi

so apni pass-book mein Dher se aa'dad kam nikle

blogging ki qasam bad-qismati kya wirus nikli

KHushi ki downloading ki alam ke zer-o-bam nikle

raqib-o-yar ki tuning kahan chal kar kahan pahunchi

baramad junk mailon mein murakkab pech-o-KHam nikle

KHusha ai wadi-e-surfing ba-chashm-e-'shahid'-e-hairan

hamare bi-focal mein ghazab ke zer-o-bam nikle