hijr ki aankhon se aankhen to milate jaiye

hijr kī āñkhoñ se āñkheñ to milāte jā.iye

hijr meñ karnā hai kyā ye to batāte jā.iye

ban ke ḳhushbū kī udāsī rahiye dil ke baaġh meñ

duur hote jā.iye nazdīk aate jā.iye

jaate jaate aap itnā kaam to kiije mirā

yaad kā saarā sar-o-sāmāñ jalāte jā.iye

rah ga.ī ummīd to barbād ho jā.ūñgā maiñ

jā.iye to phir mujhe sach-much bhulāte jā.iye

zindagī kī anjuman kā bas yahī dastūr hai

baḌh ke miliye aur mil kar duur jaate jā.iye

āḳhirash rishta to ham meñ ik ḳhushī ik ġham kā thā

muskurāte jā.iye aañsū bahāte jā.iye

vo galī hai ik sharābī chashm-e-kāfir kī galī

us galī meñ jā.iye to laḌkhaḌāte jā.iye

aap ko jab mujh se shikvā hī nahīñ koī to phir

aag hī dil meñ lagānī hai lagāte jā.iye

kuuch hai ḳhvāboñ se ta.abīroñ kī samtoñ meñ to phir

jā.iye par dam-ba-dam barbād jaate jā.iye

aap kā mehmān huuñ maiñ aap mere mezbān

so mujhe zahr-e-muravvat to pilāte jā.iye

hai sar-e-shab aur mire ghar meñ nahīñ koī charāġh

aag to is ghar meñ jānāna lagāte jā.iye

hijr ki aankhon se aankhen to milate jaiye

hijr mein karna hai kya ye to batate jaiye

ban ke KHushbu ki udasi rahiye dil ke bagh mein

dur hote jaiye nazdik aate jaiye

jate jate aap itna kaam to kije mera

yaad ka sara sar-o-saman jalate jaiye

rah gai ummid to barbaad ho jaunga main

jaiye to phir mujhe sach-much bhulate jaiye

zindagi ki anjuman ka bas yahi dastur hai

baDh ke miliye aur mil kar dur jate jaiye

aaKHirash rishta to hum mein ek KHushi ek gham ka tha

muskuraate jaiye aansu bahate jaiye

wo gali hai ek sharabi chashm-e-kafir ki gali

us gali mein jaiye to laDkhaDate jaiye

aap ko jab mujh se shikwa hi nahin koi to phir

aag hi dil mein lagani hai lagate jaiye

kuch hai KHwabon se tabiron ki samton mein to phir

jaiye par dam-ba-dam barbaad jate jaiye

aap ka mehman hun main aap mere mezban

so mujhe zahr-e-murawwat to pilate jaiye

hai sar-e-shab aur mere ghar mein nahin koi charagh

aag to is ghar mein jaanana lagate jaiye