honTon ko phul aankh ko baada nahin kaha

hoñToñ ko phuul aañkh ko baada nahīñ kahā

tujhko tirī adā se ziyāda nahīñ kahā

bartā gayā huuñ sirf kisī sair kī tarah

tuune mujhe safar kā irāda nahīñ kahā

kahtā to huuñ tujhe maiñ gul-e-ḳhush-numā magar

ḳhush rañg mausamoñ kā labāda nahīñ kahā

rahte haiñ sirf tañg-nazar log jis jagah

us shahr-e-be-karāñ ko kushāda nahīñ kahā

bāñdhā har ik ḳhayāl baḌī sādgī ke saath

lekin koī ḳhayāl bhī saada nahīñ kahā

miirī bisāt par to sabhī bādshāh haiñ

maine kabhī kisī ko piyāda nahīñ kahā

vo āsmāñ mizāj musāfir huuñ aaj tak

maine tirī zamīn ko jaada nahīñ kahā

honTon ko phul aankh ko baada nahin kaha

tujhko teri ada se ziyaada nahin kaha

barta gaya hun sirf kisi sair ki tarah

tune mujhe safar ka irada nahin kaha

kahta to hun tujhe main gul-e-KHush-numa magar

KHush rang mausamon ka labaada nahin kaha

rahte hain sirf tang-nazar log jis jagah

us shahr-e-be-karan ko kushada nahin kaha

bandha har ek KHayal baDi sadgi ke sath

lekin koi KHayal bhi sada nahin kaha

meri bisat par to sabhi baadshah hain

maine kabhi kisi ko piyaada nahin kaha

wo aasman mizaj musafir hun aaj tak

maine teri zamin ko jada nahin kaha