hote KHuda ke us but-e-kafir ki chah ki

hote ḳhudā ke us but-e-kāfir kī chaah kī

itnī to baat mujh se huī hai gunāh kī

soz-e-darūñ kiyā jo mirā sham.a ne bayāñ

jal kar zabān kaaT lī mere gavāh kī

bhartā hai aaj ḳhuub tarāre samand-e-nāz

qumchī hai un ke haath meñ zulf-e-siyāh kī

dekhā huzūr ko jo mukaddar to mar ga.e

ham miT ga.e jo aap ne mailī nigāh kī

furqat meñ yaad aa.e jo lutf-e-shab-e-visāl

ik aah bhar ke jānib-e-gardūñ nigāh kī

sunsān kar diyā mire pahlū ko le ke dil

zālim ne luuT kar mirī bastī tabāh kī

vo mujh se kah rahe haiñ ishāroñ meñ dekhnā

sab taaḌ jā.eñge sar-e-mahfil jo aah kī

ham vo the dil hī dil meñ kiyā zabt-e-rāz-e-ishq

sadme uThā ke mar ga.e muñh se na aah kī

afsos hai ki maiñ to phirūñ dar-ba-dar ḳharāb

tum ko ḳhabar na ho mire hāl-e-tabāh kī

'jauhar' ḳhudā ke fazl se aisī ġhazal kahī

shohrat mushā.ire meñ huī vāh-vāh kī

hote KHuda ke us but-e-kafir ki chah ki

itni to baat mujh se hui hai gunah ki

soz-e-darun kiya jo mera shama ne bayan

jal kar zaban kaT li mere gawah ki

bharta hai aaj KHub tarare samand-e-naz

qumchi hai un ke hath mein zulf-e-siyah ki

dekha huzur ko jo mukaddar to mar gae

hum miT gae jo aap ne maili nigah ki

furqat mein yaad aae jo lutf-e-shab-e-visal

ek aah bhar ke jaanib-e-gardun nigah ki

sunsan kar diya mere pahlu ko le ke dil

zalim ne luT kar meri basti tabah ki

wo mujh se kah rahe hain ishaaron mein dekhna

sab taD jaenge sar-e-mahfil jo aah ki

hum wo the dil hi dil mein kiya zabt-e-raaz-e-ishq

sadme uTha ke mar gae munh se na aah ki

afsos hai ki main to phirun dar-ba-dar KHarab

tum ko KHabar na ho mere haal-e-tabah ki

'jauhar' KHuda ke fazl se aisi ghazal kahi

shohrat mushaire mein hui wah-wah ki