husn-e-be-parwa ko KHud-bin o KHud-ara kar diya

husn-e-be-parvā ko ḳhud-bīn o ḳhud-ārā kar diyā

kyā kiyā maiñ ne ki iz.hār-e-tamannā kar diyā

baḌh ga.iiñ tum se to mil kar aur bhī betābiyāñ

ham ye samjhe the ki ab dil ko shakebā kar diyā

paḌh ke terā ḳhat mire dil kī ajab hālat huī

iztirāb-e-shauq ne ik hashr barpā kar diyā

ham rahe yaañ tak tirī ḳhidmat meñ sargarm-e-niyāz

tujh ko āḳhir āshnā-e-nāz-e-bejā kar diyā

ab nahīñ dil ko kisī sūrat kisī pahlū qarār

us nigāh-e-nāz ne kyā sehr aisā kar diyā

ishq se tere baḌhe kyā kyā diloñ ke martabe

mehr zarroñ ko kiyā qatroñ ko dariyā kar diyā

kyuuñ na ho terī mohabbat se munavvar jaan o dil

sham.a jab raushan huī ghar meñ ujālā kar diyā

terī mahfil se uThātā ġhair mujh ko kyā majāl

dekhtā thā maiñ ki tū ne bhī ishāra kar diyā

sab ġhalat kahte the lutf-e-yār ko vaj.h-e-sukūñ

dard-e-dil us ne to 'hasrat' aur duunā kar diyā

husn-e-be-parwa ko KHud-bin o KHud-ara kar diya

kya kiya main ne ki izhaar-e-tamanna kar diya

baDh gain tum se to mil kar aur bhi betabiyan

hum ye samjhe the ki ab dil ko shakeba kar diya

paDh ke tera KHat mere dil ki ajab haalat hui

iztirab-e-shauq ne ek hashr barpa kar diya

hum rahe yan tak teri KHidmat mein sargarm-e-niyaz

tujh ko aaKHir aashna-e-naz-e-beja kar diya

ab nahin dil ko kisi surat kisi pahlu qarar

us nigah-e-naz ne kya sehr aisa kar diya

ishq se tere baDhe kya kya dilon ke martabe

mehr zarron ko kiya qatron ko dariya kar diya

kyun na ho teri mohabbat se munawwar jaan o dil

shama jab raushan hui ghar mein ujala kar diya

teri mahfil se uThata ghair mujh ko kya majal

dekhta tha main ki tu ne bhi ishaara kar diya

sab ghalat kahte the lutf-e-yar ko wajh-e-sukun

dard-e-dil us ne to 'hasrat' aur duna kar diya