husn ki jins KHaridar liye phirti hai

husn kī jins ḳharīdār liye phirtī hai

saath bāzār kā bāzār liye phirtī hai

dar-ba-dar hasrat-e-dildār liye phirtī hai

sar-e-har-kūcha-o-bāzār liye phirtī hai

adam-ābād meñ aane kā sabab hai zāhir

justujū-e-kamar-e-yār liye phirtī hai

dil-e-sozāñ se nahīñ koī nishān-e-zulmat

mash.al-e-āh-e-shab-e-tār liye phirtī hai

aate hī fasl-e-ḳhizāñ bulbul-e-shaidā bahkī

har taraf gul kī jagah ḳhaar liye phirtī hai

dair o masjid meñ tamann-e-ziyārat kis kī

tum ko ai kāfir o dīñ-dār liye phirtī hai

dasht meñ qais ko kyā aa.e nazar jab lailā

saath meñ gard kī dīvār liye phirtī hai

daur-e-sāġhar meñ nahīñ kaf sar-e-bāda saaqī

duḳht-e-raz shaiḳh kī dastār liye phirtī hai

ḳhūn-e-farhād se bechain hai rūh-e-shīrīñ

be-sutūñ se bhī girāñ-bār liye phirtī hai

gul se kyuuñ kah nahīñ detī hai payām-e-bulbul

apne sar bād-e-sabā baar liye phirtī hai

māntā hī nahīñ lailā ki kare kyā lailā

saath meñ qais ko nā-chār liye phirtī hai

sadma pahuñchā kisī gul ko ki chaman meñ bulbul

ḳhuuñ meñ Duubī huī minqār liye phirtī hai

kushta-e-nāz kī turbat na milegī bulbul

phuul minqār meñ be-kār liye phirtī hai

tā.ir-e-dil ko havā-e-ḳham-e-zulf-e-sayyād

sūrat-e-murġh-e-giraftār liye phirtī hai

jumbishe-e-pā se hai galiyoñ meñ qayāmat barpā

saath mahshar tirī raftār liye phirtī hai

kohkan ḳhud to subuk-dosh huaa, par shīrīñ

sar pe ilzām kā kohsār liye phirtī hai

dasht-e-ġhurbat meñ nahīñ phirtā huuñ ḳhud āvāra

gardish-e-charḳh-e-sitamgār liye phirtī hai

saath duniyā kā nahīñ tālib-e-duniyā dete

apne kuttoñ ko ye murdār liye phirtī hai

hasrat-e-dīd 'asar' hazrat-e-'ātish' kī tarah

pesh-e-rauzan pas-e-dīvār liye phirtī hai

husn ki jins KHaridar liye phirti hai

sath bazar ka bazar liye phirti hai

dar-ba-dar hasrat-e-dildar liye phirti hai

sar-e-har-kucha-o-bazar liye phirti hai

adam-abaad mein aane ka sabab hai zahir

justuju-e-kamar-e-yar liye phirti hai

dil-e-sozan se nahin koi nishan-e-zulmat

mashal-e-ah-e-shab-e-tar liye phirti hai

aate hi fasl-e-KHizan bulbul-e-shaida bahki

har taraf gul ki jagah KHar liye phirti hai

dair o masjid mein tamann-e-ziyarat kis ki

tum ko ai kafir o din-dar liye phirti hai

dasht mein qais ko kya aae nazar jab laila

sath mein gard ki diwar liye phirti hai

daur-e-saghar mein nahin kaf sar-e-baada saqi

duKHt-e-raz shaiKH ki dastar liye phirti hai

KHun-e-farhad se bechain hai ruh-e-shirin

be-sutun se bhi giran-bar liye phirti hai

gul se kyun kah nahin deti hai payam-e-bulbul

apne sar baad-e-saba bar liye phirti hai

manta hi nahin laila ki kare kya laila

sath mein qais ko na-chaar liye phirti hai

sadma pahuncha kisi gul ko ki chaman mein bulbul

KHun mein Dubi hui minqar liye phirti hai

kushta-e-naz ki turbat na milegi bulbul

phul minqar mein be-kar liye phirti hai

tair-e-dil ko hawa-e-KHam-e-zulf-e-sayyaad

surat-e-murgh-e-giraftar liye phirti hai

jumbishe-e-pa se hai galiyon mein qayamat barpa

sath mahshar teri raftar liye phirti hai

kohkan KHud to subuk-dosh hua, par shirin

sar pe ilzam ka kohsar liye phirti hai

dasht-e-ghurbat mein nahin phirta hun KHud aawara

gardish-e-charKH-e-sitamgar liye phirti hai

sath duniya ka nahin talib-e-duniya dete

apne kutton ko ye murdar liye phirti hai

hasrat-e-did 'asar' hazrat-e-'atish' ki tarah

pesh-e-rauzan pas-e-diwar liye phirti hai