ifa-e-wada aap se ai yar ho chuka

īfā-e-va.ada aap se ai yaar ho chukā

us kā to imtihān ka.ī baar ho chukā

ahbāb haath uThā.eñ hamāre ilaaj se

sehat-pazīr ishq kā bīmār ho chukā

vo be-hisāb baḳhsh de ye baat aur hai

apne hisāb meñ to gunahgār ho chukā

maiñ haath joḌtā huuñ baḌī der se huzūr

lag jā.iye gale se ab inkār ho chukā

bechūñ kahāñ maiñ apne dil-e-dāġh-dār ko

saudā burā pasand ḳharīdār ho chukā

piirī meñ parvarish hai abas jism-e-zār kī

pheñkūñ kisī ghaḌī maiñ ye bekār ho chukā

barham vo shoḳh kyuuñ na ho kyuuñ zulf ko chhuā

ye haath hathkaḌī ke sazā-vār ho chukā

ab mujh se iltiyām kī bāteñ na kījiye

dil tum se phaT gayā jigar afgār ho chukā

mujh dil-figār ko na rahī tum se kuchh umiid

ye ḳhatt-e-sabz marham-e-zañgār ho chukā

darbān ko salām kareñ ghar kī raah leñ

vo muñh chhupā ke baiThe haiñ dīdār ho chukā

bande ke haal par nazar-parvarish rahe

husn-e-malīh kā maiñ namak-ḳhvār ho chukā

luuñ bosa ḳhūñ-bahā maiñ us abrū-kamān se

ab to jigar se tīr-e-nigah paar ho chukā

ai 'bahr' ab to baat bhī kartā nahīñ vo shoḳh

vo rasm-o-rāh ho chukī vo pyaar ho chukā

ifa-e-wada aap se ai yar ho chuka

us ka to imtihan kai bar ho chuka

ahbab hath uThaen hamare ilaj se

sehat-pazir ishq ka bimar ho chuka

wo be-hisab baKHsh de ye baat aur hai

apne hisab mein to gunahgar ho chuka

main hath joDta hun baDi der se huzur

lag jaiye gale se ab inkar ho chuka

bechun kahan main apne dil-e-dagh-dar ko

sauda bura pasand KHaridar ho chuka

piri mein parwarish hai abas jism-e-zar ki

phenkun kisi ghaDi main ye bekar ho chuka

barham wo shoKH kyun na ho kyun zulf ko chhua

ye hath hathkaDi ke saza-war ho chuka

ab mujh se iltiyam ki baaten na kijiye

dil tum se phaT gaya jigar afgar ho chuka

mujh dil-figar ko na rahi tum se kuchh umid

ye KHatt-e-sabz marham-e-zangar ho chuka

darban ko salam karen ghar ki rah len

wo munh chhupa ke baiThe hain didar ho chuka

bande ke haal par nazar-parwarish rahe

husn-e-malih ka main namak-KHwar ho chuka

lun bosa KHun-baha main us abru-kaman se

ab to jigar se tir-e-nigah par ho chuka

ai 'bahr' ab to baat bhi karta nahin wo shoKH

wo rasm-o-rah ho chuki wo pyar ho chuka