ek bar apna zarf-e-nazar dekh lijiye

ik baar apnā zarf-e-nazar dekh lījiye

phir chāhe jis ke aib-o-hunar dekh lījiye

kyā jaane kis maqām pe kis shai kī ho talab

chalne se pahle zād-e-safar dekh lījiye

ho jā.egā ḳhud aap ko ehsās be-ruḳhī

gar aap merā zaḳhm-e-jigar dekh lījiye

sab kī taraf hai aap kī chashm-e-navāzishāt

kaash ek baar aap idhar dekh lījiye

taare maiñ toḌ lā.ūñgā ākāsh se magar

shafqat se aap bāzū-o-par dekh lījiye

jamhūriyat kā dars agar chāhte haiñ aap

koī bhī sāya-dār shajar dekh lījiye

ho jā.egī haqīqat-e-shams-o-qamar ayaañ

un ko nigāh bhar ke agar dekh lījiye

ye barq-e-hādisāt bhī kyā zulm Dhā.egī

uThne lage guloñ se sharar dekh lījiye

'ājiz' chalī haiñ aisī ta.assub kī āñdhiyāñ

ujḌe hue nagar ke nagar dekh lījiye

ek bar apna zarf-e-nazar dekh lijiye

phir chahe jis ke aib-o-hunar dekh lijiye

kya jaane kis maqam pe kis shai ki ho talab

chalne se pahle zad-e-safar dekh lijiye

ho jaega KHud aap ko ehsas be-ruKHi

gar aap mera zaKHm-e-jigar dekh lijiye

sab ki taraf hai aap ki chashm-e-nawazishat

kash ek bar aap idhar dekh lijiye

tare main toD launga aakash se magar

shafqat se aap bazu-o-par dekh lijiye

jamhuriyat ka dars agar chahte hain aap

koi bhi saya-dar shajar dekh lijiye

ho jaegi haqiqat-e-shams-o-qamar ayan

un ko nigah bhar ke agar dekh lijiye

ye barq-e-hadisat bhi kya zulm Dhaegi

uThne lage gulon se sharar dekh lijiye

'ajiz' chali hain aisi tassub ki aandhiyan

ujDe hue nagar ke nagar dekh lijiye