ek rida-e-sabz ki KHwahish bahut mahngi paDi

ik ridā-e-sabz kī ḳhvāhish bahut mahñgī paḌī

vaqt paḌne par hameñ bārish bahut mahñgī paḌī

haath kyā taape ki poroñ se dhuāñ uThne lagā

sard rut meñ garmī-e-ātish bahut mahñgī paḌī

mom kī sīḌhī pe chaḌh kar chhū rahe the āftāb

phuul se chehroñ ko ye koshish bahut mahñgī paḌī

ḳhār-e-qismat kyā nikāle haath zaḳhmī kar liye

nāḳhun-e-tadbīr kī kāvish bahut mahñgī paḌī

is amal ne to kahīñ kā bhī na rakkhā dosto

ḳhud ko chāhe jaane kī ḳhvāhish bahut mahñgī paḌī

zikr-e-qahat-e-rañg se pahle hī taale paḌ ga.e

har lab-e-tasvīr ko jumbish bahut mahñgī paḌī

tund-ḳhū maujoñ ne 'sājid' chāñd sāhil khā liye

bahr-e-shab meñ amn kī koshish bahut mahñgī paḌī

ek rida-e-sabz ki KHwahish bahut mahngi paDi

waqt paDne par hamein barish bahut mahngi paDi

hath kya tape ki poron se dhuan uThne laga

sard rut mein garmi-e-atish bahut mahngi paDi

mom ki siDhi pe chaDh kar chhu rahe the aaftab

phul se chehron ko ye koshish bahut mahngi paDi

KHar-e-qismat kya nikale hath zaKHmi kar liye

naKHun-e-tadbir ki kawish bahut mahngi paDi

is amal ne to kahin ka bhi na rakkha dosto

KHud ko chahe jaane ki KHwahish bahut mahngi paDi

zikr-e-qahat-e-rang se pahle hi tale paD gae

har lab-e-taswir ko jumbish bahut mahngi paDi

tund-KHu maujon ne 'sajid' chand sahil kha liye

bahr-e-shab mein amn ki koshish bahut mahngi paDi