imtihan ke liye jafa kab tak

imtihāñ ke liye jafā kab tak

iltifāt-e-sitam-numā kab tak

ġhair hai bevafā pa tum to kaho

hai irāda nibāh kā kab tak

jurm mālūm hai zuleḳhā kā

tāna-e-dast-e-nārasā kab tak

mujh pe āshiq nahīñ hai kuchh zālim

sabr āḳhir kare vafā kab tak

dekhiye ḳhaak meñ milātī hai

nigah-e-chashm-e-surma-sā kab tak

kahīñ āñkheñ dikhā chuko mujh ko

jānib-e-ġhair dekhnā kab tak

na milā.eñge vo na ā.eñge

josh-e-labbaik-o-marhabā kab tak

hosh meñ aa tū mujh meñ jaan nahīñ

ġhaflat-e-jur.at-āzmā kab tak

le shab-e-vasl-e-ġhair bhī kaaTī

tū mujhe āzmā.egā kab tak

tum ko ḳhū ho ga.ī burā.ī kī

darguzar kījiye bhalā kab tak

mar chale ab to us sanam se mileñ

'momin' andesha-e-ḳhudā kab tak

imtihan ke liye jafa kab tak

iltifat-e-sitam-numa kab tak

ghair hai bewafa pa tum to kaho

hai irada nibah ka kab tak

jurm malum hai zuleKHa ka

tana-e-dast-e-narasa kab tak

mujh pe aashiq nahin hai kuchh zalim

sabr aaKHir kare wafa kab tak

dekhiye KHak mein milati hai

nigah-e-chashm-e-surma-sa kab tak

kahin aankhen dikha chuko mujh ko

jaanib-e-ghair dekhna kab tak

na milaenge wo na aaenge

josh-e-labbaik-o-marhaba kab tak

hosh mein aa tu mujh mein jaan nahin

ghaflat-e-jurat-azma kab tak

le shab-e-wasl-e-ghair bhi kaTi

tu mujhe aazmaega kab tak

tum ko KHu ho gai burai ki

darguzar kijiye bhala kab tak

mar chale ab to us sanam se milen

'momin' andesha-e-KHuda kab tak