irtikab-e-jurm shar ki baat hai

irtikāb-e-jurm shar kī baat hai

aur barī honā hunar kī baat hai

ik kahānī hai ki sadiyoñ par muhīt

sochne meñ dopahar kī baat hai

aa.e Thahre aur ravāna ho ga.e

zindagī kyā hai, safar kī baat hai

ek sho.ala sā lapak kar rah gayā

ye hayāt-e-muḳhtasar kī baat hai

nāsehā gar ho sake manzil pe mil

zindagī to rah-guzar kī baat hai

shādī-o-ġham par kareñ kyā tabsira

tere mere sab ke ghar kī baat hai

rāste to haiñ magar manzil nahīñ

kyā hamāre rāhbar kī baat hai

ab to dūkānoñ pe biktī hai vafā

dosto ifrāt-e-zar kī baat hai

bāl-o-par hote to kyuuñ hote asiir

qaid meñ kyuuñ bāl-o-par kī baat hai

mutma.in koī nahīñ hālāt se

shaam ke lab par sahar kī baat hai

har qavī ko hai vahāñ jaane kā haq

dasht kī aur bahr-o-bar kī baat hai

murdanī zaa.il ho yā baaqī rahe

ye tire husn-e-nazar kī baat hai

irtikab-e-jurm shar ki baat hai

aur bari hona hunar ki baat hai

ek kahani hai ki sadiyon par muhit

sochne mein dopahar ki baat hai

aae Thahre aur rawana ho gae

zindagi kya hai, safar ki baat hai

ek shoala sa lapak kar rah gaya

ye hayat-e-muKHtasar ki baat hai

naseha gar ho sake manzil pe mil

zindagi to rah-guzar ki baat hai

shadi-o-gham par karen kya tabsira

tere mere sab ke ghar ki baat hai

raste to hain magar manzil nahin

kya hamare rahbar ki baat hai

ab to dukanon pe bikti hai wafa

dosto ifraat-e-zar ki baat hai

baal-o-par hote to kyun hote asir

qaid mein kyun baal-o-par ki baat hai

mutmain koi nahin haalat se

sham ke lab par sahar ki baat hai

har qawi ko hai wahan jaane ka haq

dasht ki aur bahr-o-bar ki baat hai

murdani zail ho ya baqi rahe

ye tere husn-e-nazar ki baat hai