is aalam-e-hairat-o-ibrat mein kuchh bhi to sarab nahin hota

is ālam-e-hairat-o-ibrat meñ kuchh bhī to sarāb nahīñ hotā

koī niind misāl nahīñ bantī koī lamha ḳhvāb nahīñ hotā

ik umr numū kī ḳhvāhish meñ mausam ke jabr sahe to khulā

har ḳhushbū aam nahīñ hotī har phuul gulāb nahīñ hotā

is lamha-e-ḳhair-o-shar meñ kahīñ ik saa.at aisī hai jis meñ

har baat gunāh nahīñ hotī sab kār-e-savāb nahīñ hotā

mire chaar taraf āvāzeñ aur dīvāreñ phail ga.iiñ lekin

kab terī yaad nahīñ aatī aur jī be-tāb nahīñ hotā

yahāñ manzar se pas-e-manzar tak hairānī hī hairānī hai

kabhī asl kā bhed nahīñ khultā kabhī sachchā ḳhvāb nahīñ hotā

kabhī ishq karo aur phir dekho is aag meñ jalte rahne se

kabhī dil par aañch nahīñ aatī kabhī rañg ḳharāb nahīñ hotā

mirī bāteñ jīvan sapnoñ kī mire sher amānat nasloñ kī

maiñ shaah ke giit nahīñ gaatā mujh se ādāb nahīñ hotā

is aalam-e-hairat-o-ibrat mein kuchh bhi to sarab nahin hota

koi nind misal nahin banti koi lamha KHwab nahin hota

ek umr numu ki KHwahish mein mausam ke jabr sahe to khula

har KHushbu aam nahin hoti har phul gulab nahin hota

is lamha-e-KHair-o-shar mein kahin ek saat aisi hai jis mein

har baat gunah nahin hoti sab kar-e-sawab nahin hota

mere chaar taraf aawazen aur diwaren phail gain lekin

kab teri yaad nahin aati aur ji be-tab nahin hota

yahan manzar se pas-e-manzar tak hairani hi hairani hai

kabhi asl ka bhed nahin khulta kabhi sachcha KHwab nahin hota

kabhi ishq karo aur phir dekho is aag mein jalte rahne se

kabhi dil par aanch nahin aati kabhi rang KHarab nahin hota

meri baaten jiwan sapnon ki mere sher amanat naslon ki

main shah ke git nahin gata mujh se aadab nahin hota