is baat ki nahin hai koi intiha na puchh

is baat kī nahīñ hai koī intihā na pūchh

ai mudda.ā-e-ḳhalq mirā mudda.ā na pūchh

kyā kah ke phuul bantī haiñ kaliyāñ gulāb kī

ye raaz mujh se bulbul-e-shīrīñ-navā na pūchh

jitne gadā-navāz the kab ke guzar chuke

ab kyuuñ bichhā.e baiThe haiñ ham boriyā na pūchh

pesh-e-nazar hai past-o-buland-e-rah-e-junūñ

ham be-ḳhudoñ se qissa-e-arz-o-samā na pūchh

sumbul se vāsta na chaman se munāsibat

is zulf-e-mushk-bār kā haal ai sabā na pūchh

sad mahfil-e-nashāt hai ik sher-e-dil-nashīñ

is barbat-e-suḳhan meñ hai kis kī sadā na pūchh

kar rahm mere jeb o garebāñ pe ham-nafas

chaltī hai kū-e-yār meñ kyūñkar havā na pūchh

rahtā nahīñ hai dahr meñ jab koī aasrā

us vaqt aadmī pe guzartī hai kyā na pūchh

har saañs meñ hai chashma-e-haivān-o-salsabīl

phir bhī maiñ tishna-kām huuñ ye mājrā na pūchh

banda tire vajūd kā munkir nahīñ magar

duniyā ne kyā diye haiñ sabaq ai ḳhudā na pūchh

kyuuñ 'josh' rāz-e-dost kī kartā hai justujū

kah do koī ki shaah kā haal ai gadā na pūchh

is baat ki nahin hai koi intiha na puchh

ai muddaa-e-KHalq mera muddaa na puchh

kya kah ke phul banti hain kaliyan gulab ki

ye raaz mujh se bulbul-e-shirin-nawa na puchh

jitne gada-nawaz the kab ke guzar chuke

ab kyun bichhae baiThe hain hum boriya na puchh

pesh-e-nazar hai past-o-buland-e-rah-e-junun

hum be-KHudon se qissa-e-arz-o-sama na puchh

sumbul se wasta na chaman se munasibat

is zulf-e-mushk-bar ka haal ai saba na puchh

sad mahfil-e-nashat hai ek sher-e-dil-nashin

is barbat-e-suKHan mein hai kis ki sada na puchh

kar rahm mere jeb o gareban pe ham-nafas

chalti hai ku-e-yar mein kyunkar hawa na puchh

rahta nahin hai dahr mein jab koi aasra

us waqt aadmi pe guzarti hai kya na puchh

har sans mein hai chashma-e-haiwan-o-salsabil

phir bhi main tishna-kaam hun ye majra na puchh

banda tere wajud ka munkir nahin magar

duniya ne kya diye hain sabaq ai KHuda na puchh

kyun 'josh' raaz-e-dost ki karta hai justuju

kah do koi ki shah ka haal ai gada na puchh