is bhare shahr mein aaram main kaise paun

is bhare shahr meñ ārām maiñ kaise pā.ūñ

jāgte chīḳhte rañgoñ ko kahāñ le jā.ūñ

pairahan chust havā sust khaḌī dīvāreñ

use chāhūñ use rokūñ ki judā ho jā.ūñ

husn bāzār kī zīnat hai magar hai to sahī

ghar se niklā huuñ to us chauk se bhī ho aa.uuñ

laḌkiyāñ kaun se goshe meñ ziyāda hoñgī

na karūñ baat magar peḌ to gintā jā.ūñ

kar rahā huuñ jise badnām galī-kūchoñ meñ

aañkh bhī us se milāte hue maiñ gharā.ūñ

vo mujhe pyaar se dekhe bhī to phir kyā hogā

mujh meñ itnī bhī sakat kab hai ki dhokā khā.ūñ

husn ḳhud ek bhikārī hai mujhe kyā degā

kis tavaqqo.a pe maiñ dāmān-e-nazar phailā.ūñ

vāqi.a kuchh bhī ho sach kahne meñ rusvā.ī hai

kyuuñ na ḳhāmosh rahūñ ahl-e-nazar kahlā.ūñ

ek muddat se ka.ī saa.e mirī taak meñ haiñ

kab talak raat kī dīvār se sar Takrā.ūñ

ādmiyat hai ki hai gumbad-e-be-dar koī

DhūñDne niklūñ to apnā bhī na rasta pā.ūñ

liye phirtā huuñ ḳhayāloñ kā dahaktā dozaḳh

sar se ye bojh utārūñ to ḳhudā ho jā.ūñ

is bhare shahr mein aaram main kaise paun

jagte chiKHte rangon ko kahan le jaun

pairahan chust hawa sust khaDi diwaren

use chahun use rokun ki juda ho jaun

husn bazar ki zinat hai magar hai to sahi

ghar se nikla hun to us chauk se bhi ho aaun

laDkiyan kaun se goshe mein ziyaada hongi

na karun baat magar peD to ginta jaun

kar raha hun jise badnam gali-kuchon mein

aankh bhi us se milate hue main gharaun

wo mujhe pyar se dekhe bhi to phir kya hoga

mujh mein itni bhi sakat kab hai ki dhoka khaun

husn KHud ek bhikari hai mujhe kya dega

kis tawaqqoa pe main daman-e-nazar phailaun

waqia kuchh bhi ho sach kahne mein ruswai hai

kyun na KHamosh rahun ahl-e-nazar kahlaun

ek muddat se kai sae meri tak mein hain

kab talak raat ki diwar se sar Takraun

aadmiyat hai ki hai gumbad-e-be-dar koi

DhunDne niklun to apna bhi na rasta paun

liye phirta hun KHayalon ka dahakta dozaKH

sar se ye bojh utarun to KHuda ho jaun