is dasht-e-be-panah ki had par bhi KHush nahin

is dasht-e-be-panāh kī had par bhī ḳhush nahīñ

maiñ apnī ḳhvāhishoñ se bichhaḌ kar bhī ḳhush nahīñ

ik sarḳhushī muhīt hai chāroñ taraf magar

bastī meñ koī shaḳhs koī ghar bhī ḳhush nahīñ

kitne haiñ log ḳhud ko jo kho kar udaas haiñ

aur kitne apne-āp ko pā kar bhī ḳhush nahīñ

ye kaifiyat ġhulām nahīñ qaid-o-band kī

andar jo apne ḳhush nahīñ bāhar bhī ḳhush nahīñ

sāhil kī bhīgī ret pe chaltā barahna-pā

maiñ huuñ udaas aur samundar bhī ḳhush nahīñ

is dasht-e-be-panah ki had par bhi KHush nahin

main apni KHwahishon se bichhaD kar bhi KHush nahin

ek sarKHushi muhit hai chaaron taraf magar

basti mein koi shaKHs koi ghar bhi KHush nahin

kitne hain log KHud ko jo kho kar udas hain

aur kitne apne-ap ko pa kar bhi KHush nahin

ye kaifiyat ghulam nahin qaid-o-band ki

andar jo apne KHush nahin bahar bhi KHush nahin

sahil ki bhigi ret pe chalta barahna-pa

main hun udas aur samundar bhi KHush nahin