is se pahle ki zamin-zad shararat kar jaen

is se pahle ki zamīñ-zād sharārat kar jaa.eñ

ham sitāroñ ne ye sochā hai ki hijrat kar jaa.eñ

daulat-e-ḳhvāb hamāre jo kisī kaam na aa.ī

ab kisī ko nahīñ milne kī vasiyyat kar jaa.eñ

dahr se ham yūñhī be-kār chale jaate the

phir ye sochā ki chalo ek mohabbat kar jaa.eñ

ik zarā vaqt mayassar ho to aa kar mire dost

dil meñ khilte hue phūloñ ko nasīhat kar jaa.eñ

un havā-ḳhvāhoñ se kahnā ki zarā shaam Dhale

aa.eñ aur bazm-e-charāġhāñ kī sadārat kar jaa.eñ

dil kī ik ek ḳharābī kā sabab jānte haiñ

phir bhī mumkin hai ki ham tum se muravvat kar jaa.eñ

shahr ke ba.ad to sahrā thā miyāñ ḳhair huī

dasht ke paar bhalā kyā hai ki vahshat kar jaa.eñ

reg-e-dil meñ ka.ī nādīda parinde bhī haiñ dafn

sochte hoñge ki dariyā kī ziyārat kar jaa.eñ

is se pahle ki zamin-zad shararat kar jaen

hum sitaron ne ye socha hai ki hijrat kar jaen

daulat-e-KHwab hamare jo kisi kaam na aai

ab kisi ko nahin milne ki wasiyyat kar jaen

dahr se hum yunhi be-kar chale jate the

phir ye socha ki chalo ek mohabbat kar jaen

ek zara waqt mayassar ho to aa kar mere dost

dil mein khilte hue phulon ko nasihat kar jaen

un hawa-KHwahon se kahna ki zara sham Dhale

aaen aur bazm-e-charaghan ki sadarat kar jaen

dil ki ek ek KHarabi ka sabab jaante hain

phir bhi mumkin hai ki hum tum se murawwat kar jaen

shahr ke baad to sahra tha miyan KHair hui

dasht ke par bhala kya hai ki wahshat kar jaen

reg-e-dil mein kai nadida parinde bhi hain dafn

sochte honge ki dariya ki ziyarat kar jaen