iztirab-e-dil mein aa ja kar dawam aa hi gaya

iztirāb-e-dil meñ aa jā kar davām aa hī gayā

zindagī ko ek hālat par qayām aa hī gayā

ittifāqan is galī se le baḌhī umr-e-ravāñ

maiñ to samjhā thā ki ab merā maqām aa hī gayā

ho ga.ī āvāragardī be-gharī kī parda-dār

kaam jitnā ham ko aatā thā vo kaam aa hī gayā

bandagī-āmoz bazm-e-zindagī bechārgī

aadmī ko jab ġharaz aTkī salām aa hī gayā

intizām-e-roz-e-ishrat aur kar ai nā-murād

iid aatī hī rahī māh-e-siyām aa hī gayā

riñd jaane riñd kā īmān jaane shaġhl-e-riñd

pand-go ke muñh tak aanā thā harām aa hī gayā

ho gayā tark-e-talab kā naam ijz-e-hausla

jis se ham Darte rahe vo ittihām aa hī gayā

ab kaheñ kis se ki un se baat karnā hai gunāh

jab kalām aayā zabāñ par lā-kalām aa hī gayā

avval avval ḳhuub dauḌī kashtī-e-ahl-e-havas

āḳhir āḳhir Duub marne kā maqām aa hī gayā

rif.at-e-hastī ko pastī ne dikhāyā āsmāñ

jhoñpaḌoñ tak ūñche mahloñ se salām aa hī gayā

aa gayā hai ai falak zarroñ ko ehsās-e-ḳhudī

maiñ samajhtā huuñ ki vaqt-e-intiqām aa hī gayā

vo musalsal ab kahāñ tābānī-e-roz-e-nashāt

rah-rav-e-maġhrūr dekhā vaqt-e-shām aa hī gayā

hashr se achchhā rahā ik fitna-e-mahshar-ḳhirām

phir tamām aatā na aatā nā-tamām aa hī gayā

talḳh-kām afzā.ish-e-shīrīnī-e-ishrat huī

aate aate ho ke zahr-ālūd jaam aa hī gayā

baat kyā chhuptī ki thā apnā judā tarz-e-kalām

naam aayā bhī na thā 'nātiq' ki naam aa hī gayā

iztirab-e-dil mein aa ja kar dawam aa hi gaya

zindagi ko ek haalat par qayam aa hi gaya

ittifaqan is gali se le baDhi umr-e-rawan

main to samjha tha ki ab mera maqam aa hi gaya

ho gai aawaragardi be-ghari ki parda-dar

kaam jitna hum ko aata tha wo kaam aa hi gaya

bandagi-amoz bazm-e-zindagi bechaargi

aadmi ko jab gharaz aTki salam aa hi gaya

intizam-e-roz-e-ishrat aur kar ai na-murad

id aati hi rahi mah-e-siyam aa hi gaya

rind jaane rind ka iman jaane shaghl-e-rind

pand-go ke munh tak aana tha haram aa hi gaya

ho gaya tark-e-talab ka nam ijz-e-hausla

jis se hum Darte rahe wo ittiham aa hi gaya

ab kahen kis se ki un se baat karna hai gunah

jab kalam aaya zaban par la-kalam aa hi gaya

awwal awwal KHub dauDi kashti-e-ahl-e-hawas

aaKHir aaKHir Dub marne ka maqam aa hi gaya

rifat-e-hasti ko pasti ne dikhaya aasman

jhonpaDon tak unche mahlon se salam aa hi gaya

aa gaya hai ai falak zarron ko ehsas-e-KHudi

main samajhta hun ki waqt-e-intiqam aa hi gaya

wo musalsal ab kahan tabani-e-roz-e-nashat

rah-raw-e-maghrur dekha waqt-e-sham aa hi gaya

hashr se achchha raha ek fitna-e-mahshar-KHiram

phir tamam aata na aata na-tamam aa hi gaya

talKH-kaam afzaish-e-shirini-e-ishrat hui

aate aate ho ke zahr-alud jam aa hi gaya

baat kya chhupti ki tha apna juda tarz-e-kalam

nam aaya bhi na tha 'natiq' ki nam aa hi gaya