jab kabhi unki tawajjoh mein kami pai gai

jab kabhī un kī tavajjoh meñ kamī paa.ī ga.ī

az-sar-e-nau dāstān-e-shauq dohrā.ī ga.ī

bik ga.e jab tere lab phir tujh ko kyā shikva agar

zindagānī baada o sāġhar se bahlā.ī ga.ī

ai ġham-e-duniyā tujhe kyā ilm tere vāste

kin bahānoñ se tabī.at raah par laa.ī ga.ī

ham kareñ tark-e-vafā achchhā chalo yuuñ hī sahī

aur agar tark-e-vafā se bhī na rusvā.ī ga.ī

kaise kaise chashm o aariz gard-e-ġham se bujh ga.e

kaise kaise paikaroñ kī shān-e-zebā.ī ga.ī

dil kī dhaḌkan meñ tavāzun aa chalā hai ḳhair ho

merī nazreñ bujh ga.iiñ yā terī ra.anā.ī ga.ī

un kā ġham un kā tasavvur un ke shikve ab kahāñ

ab to ye bāteñ bhī ai dil ho ga.iiñ aa.ī ga.ī

jur.at-e-insāñ pe go tādīb ke pahre rahe

fitrat-e-insāñ ko kab zanjīr pahnā.ī ga.ī

arsa-e-hastī meñ ab tesha-zanoñ kā daur hai

rasm-e-chañgezī uThī tauqīr-e-dārā.ī ga.ī

jab kabhi un ki tawajjoh mein kami pai gai

az-sar-e-nau dastan-e-shauq dohrai gai

bik gae jab tere lab phir tujh ko kya shikwa agar

zindagani baada o saghar se bahlai gai

ai gham-e-duniya tujhe kya ilm tere waste

kin bahanon se tabiat rah par lai gai

hum karen tark-e-wafa achchha chalo yun hi sahi

aur agar tark-e-wafa se bhi na ruswai gai

kaise kaise chashm o aariz gard-e-gham se bujh gae

kaise kaise paikaron ki shan-e-zebai gai

dil ki dhaDkan mein tawazun aa chala hai KHair ho

meri nazren bujh gain ya teri ranai gai

un ka gham un ka tasawwur un ke shikwe ab kahan

ab to ye baaten bhi ai dil ho gain aai gai

jurat-e-insan pe go tadib ke pahre rahe

fitrat-e-insan ko kab zanjir pahnai gai

arsa-e-hasti mein ab tesha-zanon ka daur hai

rasm-e-changezi uThi tauqir-e-darai gai