jab KHuda ko jahan basana tha

jab ḳhudā ko jahāñ basānā thā

tujh ko aisā nahīñ banānā thā

mere ghar terā aanā jaanā thā

vo bhī ai yaar kyā zamāna thā

phir ga.e aap mere kūche se

do qadam par ġharīb-ḳhāna thā

jo na samjhe ki āshiqī kyā hai

us se be-kār dil lagānā thā

aa.e the baḳht āzmāne ham

aap ko teġh āzmānā thā

ai sitamgār qabr-e-āshiq par

chand aañsū tujhe bahānā thā

tū ne rahne diyā pas-e-dīvār

varna apnā kahāñ Thikānā thā

ab jahāñ par hai shaiḳh kī masjid

pahle us jā sharāb-ḳhāna thā

daḳhl ahl-e-riyā na rakhte the

pāk-bāzoñ kā aanā jaanā thā

bazm meñ ġhair ko na bulvāte

aap ko jab hameñ bulānā thā

vo chaman ab ḳhizāñ-rasīda hai

bulbuloñ kā jahāñ tarāna thā

sunte haiñ vo shajar bhī suukh gayā

jis pe sayyād āshiyāna thā

dil na dete use to kyā karte

ai 'asar' dukh hameñ uThānā thā

jab KHuda ko jahan basana tha

tujh ko aisa nahin banana tha

mere ghar tera aana jaana tha

wo bhi ai yar kya zamana tha

phir gae aap mere kuche se

do qadam par gharib-KHana tha

jo na samjhe ki aashiqi kya hai

us se be-kar dil lagana tha

aae the baKHt aazmane hum

aap ko tegh aazmana tha

ai sitamgar qabr-e-ashiq par

chand aansu tujhe bahana tha

tu ne rahne diya pas-e-diwar

warna apna kahan Thikana tha

ab jahan par hai shaiKH ki masjid

pahle us ja sharab-KHana tha

daKHl ahl-e-riya na rakhte the

pak-bazon ka aana jaana tha

bazm mein ghair ko na bulwate

aap ko jab hamein bulana tha

wo chaman ab KHizan-rasida hai

bulbulon ka jahan tarana tha

sunte hain wo shajar bhi sukh gaya

jis pe sayyaad aashiyana tha

dil na dete use to kya karte

ai 'asar' dukh hamein uThana tha