jab se hua hai ishq tere ism-e-zat ka

jab se huā hai ishq tire ism-e-zāt kā

āñkhoñ meñ phir rahā hai muraqqa.a najāt kā

mālik hī ke suḳhan meñ talavvun jo pā.iye

kahiye yaqīn lā.iye phir kis kī baat kā

daftar hamārī umr kā dekhoge jab kabhī

fauran use karoge muraqqa.a najāt kā

ulfat meñ mar miTe haiñ to pūchhe hī jā.eñge

ik roz lutf uThā.eñge is vārdāt kā

surḳhī kī ḳhatt-e-shauq meñ hājat jahāñ huī

ḳhūn-e-jigar meñ nok Duboyā davāt kā

mūjid jo nuur kā hai vo merā charāġh hai

parvāna huuñ maiñ anjuman-e-kā.enāt kā

ai sham-e-bazm-e-yār vo parvāna kaun thā

lau meñ tirī ye daaġh hai jis kī vafāt kā

mujh se to lan-tarāniyāñ us ne kabhī na kiiñ

muusī javāb de na sake jis kī baat kā

is be-ḳhudī kā deñge ḳhudā ko vo kyā javāb

dam bharte haiñ jo chand nafas ke hubāb kā

qudsī hue mutī.a vo taa.at bashar ne kī

kul iḳhtiyār haq ne diyā kā.enāt kā

aisā itāb-nāma to dekhā sunā nahīñ

aayā hai kis ke vāste suura barāt kā

zī-rūh mujh ko tū ne kiyā musht-e-ḳhāk se

banda rahūñgā maiñ tire is iltifāt kā

nāchīz huuñ magar maiñ huuñ un kā fasāna-go

qur.ān hamd-nāma hai jin kī sifāt kā

royā hai merā dīda-e-tar kis shahīd ko

mash.hūr ho gayā hai jo chashma furāt kā

aa.e to aa.e ālam-e-arvāh se vahāñ

dam bhar jahāñ nahīñ hai bharosā sabāt kā

dhuum us ke husn kī hai do-ālam meñ ai 'shraf'

ḳhurshīd roz kā hai vo mahtāb raat kā

jab se hua hai ishq tere ism-e-zat ka

aankhon mein phir raha hai muraqqa najat ka

malik hi ke suKHan mein talawwun jo paiye

kahiye yaqin laiye phir kis ki baat ka

daftar hamari umr ka dekhoge jab kabhi

fauran use karoge muraqqa najat ka

ulfat mein mar miTe hain to puchhe hi jaenge

ek roz lutf uThaenge is wardat ka

surKHi ki KHatt-e-shauq mein hajat jahan hui

KHun-e-jigar mein nok Duboya dawat ka

mujid jo nur ka hai wo mera charagh hai

parwana hun main anjuman-e-kaenat ka

ai sham-e-bazm-e-yar wo parwana kaun tha

lau mein teri ye dagh hai jis ki wafat ka

mujh se to lan-taraniyan us ne kabhi na kin

musi jawab de na sake jis ki baat ka

is be-KHudi ka denge KHuda ko wo kya jawab

dam bharte hain jo chand nafas ke hubab ka

qudsi hue mutia wo taat bashar ne ki

kul iKHtiyar haq ne diya kaenat ka

aisa itab-nama to dekha suna nahin

aaya hai kis ke waste sura baraat ka

zi-ruh mujh ko tu ne kiya musht-e-KHak se

banda rahunga main tere is iltifat ka

nachiz hun magar main hun un ka fasana-go

quran hamd-nama hai jin ki sifat ka

roya hai mera dida-e-tar kis shahid ko

mashhur ho gaya hai jo chashma furaat ka

aae to aae aalam-e-arwah se wahan

dam bhar jahan nahin hai bharosa sabaat ka

dhum us ke husn ki hai do-alam mein ai 'shraf'

KHurshid roz ka hai wo mahtab raat ka