chahat mein kya duniya-dari ishq mein kaisi majburi

chāhat meñ kyā duniyā-dārī ishq meñ kaisī majbūrī

logoñ kā kyā samjhāne do un kī apnī majbūrī

maiñ ne dil kī baat rakhī aur tū ne duniyā vāloñ kī

merī arz bhī majbūrī thī un kā hukm bhī majbūrī

rok sako to pahlī bārish kī būñdoñ ko tum roko

kachchī miTTī to mahkegī hai miTTī kī majbūrī

zāt-kade meñ pahroñ bāteñ aur milīñ to mohr ba-lab

jabr-e-vaqt ne baḳhshī ham ko ab ke kaisī majbūrī

jab tak hañstā gaatā mausam apnā hai sab apne haiñ

vaqt paḌe to yaad aa jaatī hai masnūī majbūrī

ik āvāra bādal se kyuuñ maiñ ne saaya māñgā thā

merī bhī ye nādānī thī us kī bhī thī majbūrī

muddat guzrī ik va.ade par aaj bhī qaa.em haiñ 'mohsin'

ham ne saarī umr nibāhī apnī pahlī majbūrī

chahat mein kya duniya-dari ishq mein kaisi majburi

logon ka kya samjhane do un ki apni majburi

main ne dil ki baat rakhi aur tu ne duniya walon ki

meri arz bhi majburi thi un ka hukm bhi majburi

rok sako to pahli barish ki bundon ko tum roko

kachchi miTTi to mahkegi hai miTTi ki majburi

zat-kade mein pahron baaten aur milin to mohr ba-lab

jabr-e-waqt ne baKHshi hum ko ab ke kaisi majburi

jab tak hansta gata mausam apna hai sab apne hain

waqt paDe to yaad aa jati hai masnui majburi

ek aawara baadal se kyun main ne saya manga tha

meri bhi ye nadani thi us ki bhi thi majburi

muddat guzri ek wade par aaj bhi qaem hain 'mohsin'

hum ne sari umr nibahi apni pahli majburi