jawani yaad hum ko apni phir be-iKHtiyar aai

javānī yaad ham ko apnī phir be-iḳhtiyār aa.ī

huā dīvānoñ meñ jab ġhul bahār aa.ī bahār aa.ī

huā thā marg se ġhāfil maiñ kis din josh-e-vahshat meñ

sabā kyuuñ le ke mere sāmne musht-e-ġhubār aa.ī

dikhā.e ranj piirī ke ajal tere taġhāful ne

tujhe aanā thā pahle aah tū anjām kaar aa.ī

hamāre tausan-e-umr-e-ravāñ ke tez karne ko

shamīm-e-zulf dosh-e-bād-e-sarsar par savār aa.ī

na paayā vaqt ai zāhid koī maiñ ne ibādat kā

shab-e-hijrāñ huī āḳhir to sub.h-e-intizār aa.ī

na kuchh ḳhatra ḳhizāñ kā hai na ehsān-e-bahār us par

adam se apnī shāḳh-e-ārzū be-barg-o-bār aa.ī

hamārī dekhiyo ġhaflat na samjhe vaa.e nādānī

hameñ do din ke bahlāne ko umr-e-be-madār aa.ī

jo nañg-e-ishq haiñ vo bul-havas fariyād karte haiñ

lab-e-zaḳhm-e-'havas' se kab sadā-e-zīnhār aa.ī

jawani yaad hum ko apni phir be-iKHtiyar aai

hua diwanon mein jab ghul bahaar aai bahaar aai

hua tha marg se ghafil main kis din josh-e-wahshat mein

saba kyun le ke mere samne musht-e-ghubar aai

dikhae ranj piri ke ajal tere taghaful ne

tujhe aana tha pahle aah tu anjam kar aai

hamare tausan-e-umr-e-rawan ke tez karne ko

shamim-e-zulf dosh-e-baad-e-sarsar par sawar aai

na paya waqt ai zahid koi main ne ibaadat ka

shab-e-hijran hui aaKHir to subh-e-intizar aai

na kuchh KHatra KHizan ka hai na ehsan-e-bahaar us par

adam se apni shaKH-e-arzu be-barg-o-bar aai

hamari dekhiyo ghaflat na samjhe wae nadani

hamein do din ke bahlane ko umr-e-be-madar aai

jo nang-e-ishq hain wo bul-hawas fariyaad karte hain

lab-e-zaKHm-e-'hawas' se kab sada-e-zinhaar aai