jhamak dikhate hi us dil-ruba ne luT liya

jhamak dikhāte hī us dil-rubā ne luuT liyā

hameñ to pahle hī us kī adā ne luuT liyā

nigah ke Thag kī lagāvaT ne fan se kar ġhāfil

hañsī ne Daal dī phāñsī duā ne luuT liyā

vafā jafā ne ye kī jañg-e-zar-garī ham se

vafā ne bātoñ lagāyā jafā ne luuT liyā

luTe ham us kī galī meñ to yuuñ pukāre log

ki ik faqīr ko ik bādshā ne luuT liyā

abhī kaheñ to kisī ko na e'tibār aave

ki ham ko raah meñ ik āshnā ne luuT liyā

hazāroñ qāfile jis shoḳh ne kiye ġhārat

'nazīr' ko bhī usī bevafā ne luuT liyā

jhamak dikhate hi us dil-ruba ne luT liya

hamein to pahle hi us ki ada ne luT liya

nigah ke Thag ki lagawaT ne fan se kar ghafil

hansi ne Dal di phansi dua ne luT liya

wafa jafa ne ye ki jang-e-zar-gari hum se

wafa ne baaton lagaya jafa ne luT liya

luTe hum us ki gali mein to yun pukare log

ki ek faqir ko ek baadsha ne luT liya

abhi kahen to kisi ko na e'tibar aawe

ki hum ko rah mein ek aashna ne luT liya

hazaron qafile jis shoKH ne kiye ghaarat

'nazir' ko bhi usi bewafa ne luT liya