jigar ko dagh main manind-e-lala kya karta

jigar ko daaġh maiñ mānind-e-lāla kyā kartā

labālab apne lahū kā piyāla kyā kartā

milā na sarv ko kuchh apnī rāstī meñ phal

kulāh kaj jo na kartā to laala kyā kartā

jarīda meñ rah-e-pur-ḳhūn-e-ishq se guzrā

jaras se qāfile meñ bahs-e-nāla kyā kartā

junūn-e-ishq meñ rahnā thā imtiyāz na kuchh

chakor tauq-e-gulū mah kā haala kyā kartā

bajā kiyā use toḌā jo sar se dariyā ke

habāb le ke ye ḳhālī piyāla kyā kartā

na khāyā ġhussa kabhī ḳhvānche se qismat ke

phañse jo halq meñ maiñ vo nivāla kyā kartā

balā-e-bad huī dāġhoñ se sardī-e-kāfūr

sulūk nek zarā.at se zhāla kyā kartā

diyā navishta na us but ko dil ke tuude meñ

ḳhudā ke ghar kā bhalā maiñ qabāla kyā kartā

safā huā na riyāzat se nafs-e-ammāra

koī najāsat-e-sag kā izāla kyā kartā

lagī hai aag jo kambal kabhī uḌhāyā hai

tire barahna se garmī do-shāla kyā kartā

na kartī aql agar muft āsmāñ kī sair

koī ye saat varaq kā risāla kyā kartā

mirī taraf jo unheñ khīñchtī kashish dil kī

butoñ ko brahmanoñ kā havāla kyā kartā

kisī ne mol na pūchhā dil-e-shikasta kā

koī ḳharīd ke TuuTā piyāla kyā kartā

urūs-e-dahr se bū-e-vafā nahīñ aatī

bhalā jigar kā maiñ us ke izāla kyā kartā

mah-e-do-hafta bhī hotā to lutf thā 'ātish'

akele pī ke sharāb-e-do-sāla kyā kartā

jigar ko dagh main manind-e-lala kya karta

labaalab apne lahu ka piyala kya karta

mila na sarw ko kuchh apni rasti mein phal

kulah kaj jo na karta to lala kya karta

jarida mein rah-e-pur-KHun-e-ishq se guzra

jaras se qafile mein bahs-e-nala kya karta

junun-e-ishq mein rahna tha imtiyaz na kuchh

chakor tauq-e-gulu mah ka haala kya karta

baja kiya use toDa jo sar se dariya ke

habab le ke ye KHali piyala kya karta

na khaya ghussa kabhi KHwanche se qismat ke

phanse jo halq mein main wo niwala kya karta

bala-e-bad hui daghon se sardi-e-kafur

suluk nek zaraat se zhaala kya karta

diya nawishta na us but ko dil ke tude mein

KHuda ke ghar ka bhala main qabaala kya karta

safa hua na riyazat se nafs-e-ammara

koi najasat-e-sag ka izala kya karta

lagi hai aag jo kambal kabhi uDhaya hai

tere barahna se garmi do-shaala kya karta

na karti aql agar muft aasman ki sair

koi ye sat waraq ka risala kya karta

meri taraf jo unhen khinchti kashish dil ki

buton ko brahmanon ka hawala kya karta

kisi ne mol na puchha dil-e-shikasta ka

koi KHarid ke TuTa piyala kya karta

urus-e-dahr se bu-e-wafa nahin aati

bhala jigar ka main us ke izala kya karta

mah-e-do-hafta bhi hota to lutf tha 'atish'

akele pi ke sharab-e-do-sala kya karta