jin ke nasib mein aab-o-dana kam kam hota hai

jin ke nasīb meñ āb-o-dāna kam kam hotā hai

maa.il un kī samt zamāna kam kam hotā hai

raste hī meñ ho jaatī haiñ bāteñ bas do-chār

ab to un ke ghar bhī jaanā kam kam hotā hai

mushkil hī se kar letī hai duniyā use qubūl

aisī haqīqat jis meñ fasāna kam kam hotā hai

kabhī jo bāteñ ishq ke sāl-o-sin kā hāsil thiiñ

ab un bātoñ kā yaad aanā kam kam hotā hai

riñd sabhī sāġhar par sāġhar chhalkāte jaate haiñ

kyuuñ labrez mirā paimāna kam kam hotā hai

baat pate kī kar jaatā hai yuuñ to kabhī kabhī

hosh meñ lekin ye dīvāna kam kam hotā hai

kitnī muqaddas hogī 'akbar' us bachche kī pyaas

jis kī ik Thokar se ravāna zamzam hotā hai

jin ke nasib mein aab-o-dana kam kam hota hai

mail un ki samt zamana kam kam hota hai

raste hi mein ho jati hain baaten bas do-chaar

ab to un ke ghar bhi jaana kam kam hota hai

mushkil hi se kar leti hai duniya use qubul

aisi haqiqat jis mein fasana kam kam hota hai

kabhi jo baaten ishq ke sal-o-sin ka hasil thin

ab un baaton ka yaad aana kam kam hota hai

rind sabhi saghar par saghar chhalkate jate hain

kyun labrez mera paimana kam kam hota hai

baat pate ki kar jata hai yun to kabhi kabhi

hosh mein lekin ye diwana kam kam hota hai

kitni muqaddas hogi 'akbar' us bachche ki pyas

jis ki ek Thokar se rawana zamzam hota hai