jin pe ajal tari thi un ko zinda karta hai

jin pe ajal taarī thī un ko zinda kartā hai

sūraj jal kar kitne diloñ ko ThanDā kartā hai

kitne shahr ujaḌ jaate haiñ kitne jal jaate haiñ

aur chup-chāp zamāna sab kuchh dekhā kartā hai

majbūroñ kī baat alag hai un par kyā ilzām

jis ko nahīñ koī majbūrī vo kyā kartā hai

himmat vaale pal meñ badal dete haiñ duniyā ko

sochne vaalā dil to baiThā sochā kartā hai

jis bastī meñ nafsā-nafsī kā qānūn chale

us bastī meñ kaun kisī kī parvā kartā hai

pyaar bharī āvāz kī lai meñ maddham lahje meñ

tanhā.ī meñ koī mujh se bolā kartā hai

us ik sham-e-farozāñ ke haiñ aur bhī parvāne

chāñd akelā kab sūraj kā halqa kartā hai

ruuh barahna nafs barahna zaat barhana jis kī

jism pe vo kyā kyā poshākeñ pahnā kartā hai

ashkoñ ke sailāb-e-ravāñ ko 'akbar' mat roko

bah jaa.e to bojh ye dil kā halkā kartā hai

jin pe ajal tari thi un ko zinda karta hai

suraj jal kar kitne dilon ko ThanDa karta hai

kitne shahr ujaD jate hain kitne jal jate hain

aur chup-chap zamana sab kuchh dekha karta hai

majburon ki baat alag hai un par kya ilzam

jis ko nahin koi majburi wo kya karta hai

himmat wale pal mein badal dete hain duniya ko

sochne wala dil to baiTha socha karta hai

jis basti mein nafsa-nafsi ka qanun chale

us basti mein kaun kisi ki parwa karta hai

pyar bhari aawaz ki lai mein maddham lahje mein

tanhai mein koi mujh se bola karta hai

us ek sham-e-farozan ke hain aur bhi parwane

chand akela kab suraj ka halqa karta hai

ruh barahna nafs barahna zat barhana jis ki

jism pe wo kya kya poshaken pahna karta hai

ashkon ke sailab-e-rawan ko 'akbar' mat roko

bah jae to bojh ye dil ka halka karta hai